گلگت/مظفر آباد/آزاد کشمیر(پی پی آئی) گلگت بلتستان، کشمیر، شمال مشرقی پنجاب، بالائی خیبر پختونخوا اورمغربی بلوچستان میں چند مقامات پر تیز ہواوں اور گرج چمک کے ساتھ بارش اور بلند پہاڑوں پر برفباری کا امکان ہے.محکمہ موسمیات کے مطابق تاہم ملک کے بیشتر علاقوں میں موسم جزوی طور پر ابرآلود جبکہ بالائی علاقوں میں سرد رہے گا۔پی پی آئی کے مطابق  اس دوران بلوچستان، پنجاب، خیبرپختونخوا اور کشمیر میں چند مقامات پر بارش کا امکان ہے۔

چترال(پی پی آئی)چترال میں شادی کے وقت داماد سے بندوق اور بیل مانگنے کی مکروہ رسم پر  جرگہ نے پابندی عائد کر دی ہے۔کیونکہ یہ رواج چترال میں عام ہے جس کو ہر صورت پورا کرنا پڑتا ہے۔’ولیمے اور شادی بیاہ کی نسبت ان غیر ضروری رسومات کی وجہ سے اخراجات دگنا ہوجاتے ہیں۔ اَپر چترال میں شادی کے وقت سسر کے  مانگنے پر نقد پیسوں کے علاوہ گاڑی بھی دی جاتی ہے۔ چترالی ثقافت میں ’داماد سے شادی بیاہ میں مطالبات کرنے کی رسم قدیم دور سے چلی آ رہی ہے۔‘ داماد سے لڑکی کا باپ یا بھائی ڈیمانڈ کرتا ہے جسے ’بار‘ کہا جاتا ہے جبکہ اس رسم کو ’مل‘ کے نام سے بھی پکارا جاتا ہے۔چترال کی مقامی رسم کے تحت دلہا اپنے سسر کو بیل اور بندوق تحفے میں دیتا ہے ’گزرے زمانے میں داماد سے تلوار، گائے، بیل یا گھوڑے کا مطالبہ کیا جاتا تھا مگر اب دور جدید میں نقد پیسے، گاڑی یا پھر موبائل وغیرہ مانگا جاتا ہے۔‘داماد جب ولیمے کے بعد ساس سے ملنے جاتا ہے تو الگ سے تحائف کا خرچہ برداشت کرتا ہے جبکہ ’کولی بار‘ کی رسم دلہن کے گھر والے پوری کرتے ہیں۔ ’ان رسومات کو چترال کا ہر باسی مجبوراً پورا کر رہا ہے حالانکہ ان کا سنت یا شریعت سے کوئی تعلق نہیں ہے۔‘ اَپر چترال کے علاقے کھوت میں ایک  جرگہ تشکیل دیا گیا جس میں گاؤں کے علما، اساتذہ اور تمام طبقہ فکر کے افراد شامل تھے جس نے غیر ضروری رسومات پر پابندی لگانے کی قرار داد متفقہ طور پر منظور کی۔ اس قرار داد کے تحت اب سسرال کی جانب سے دلہے سے بندوق، جانور یعنی بیل اور پیسے مانگنے پر پابندی ہوگی ’کھوت گاؤں 25 سو گھرانوں پر مشتمل ہے جہاں اس متفقہ قرار داد کی منظوری کے بعد یہ رسومات پوری نہیں کی جائیں گی۔ کسی شہری نے اگر خلاف ورزی کی تو اس کا سماجی بائیکاٹ ہو گا۔‘

 اسلام آباد (پی پی آئی) سینیئر پاکستانی  صحافی  ارشد شریف  کی پہلی برسی پیر کو منائی گئی،انہیں ایک برس سال قبل پیر 23اکتوبر   کے دن کینیا میں مبینہ پولیس مقابلے کے دوران قتل کر دیا گیا تھا۔پی پی آئی کے مطابق23 اکتوبر 2022 کو کینیا کے شہر نیروبی میں مگاڈی ہائی وے پر پیش آنے والے اس واقعے کو بعد ازاں کینیا کی پولیس کی جانب سے غلط شناخت کا واقعہ قرار دیا گیا تاہم ارشد شریف کے قتل کیس کی تحقیقات میں کینیا پولیس کے مؤقف میں تضاد پایا گیا۔ پاکستانی سپریم کورٹ نے صحافی ارشد شریف کے قتل پر ازخود نوٹس بھی لیا تھا۔