کراچی: قو می کرکٹ ٹیم کے آل راونڈر شاہد آفریدی نے کہا ہے مشکل وقت میں ٹیم پر تنقید کے بجائے اس کا ساتھ دینا چاہیے۔ میڈیا بھی اس حوالے سے مثبت کردار ادا کرے، میڈیا پر بیٹھے ہوئے ہیکل اینڈ جیکل نے ٹیم کے حوصلے پست کئے، ورلڈ کپ سے پہلے اچھا پرفارم کرنا ضروری ہے، ایسا نہیں ہوسکتا سینئر پرفارم نہ کرے اور جونئیر کی پرفارمنس سے ٹیم جیت جائے۔ جنوبی افریقہ کے دورے سے واپسی پر کراچی ائیرپورٹ پر شاہد آفریدی نے صحافیوں کی جانب سے ٹیم میں گروپ بندی کے حوالے سے پوچھے گئے ایک سوال کے جواب میں کہا کہ ان کی سمجھ میں یہ نہیں آتی ہے کہ جب ٹیم ہارتی ہے تو ٹیم میں گروپ بن جاتے ہیں اور جب جیتی ہے تو گروپ نہیں بنتے ہیں۔’ میڈیا کو مثبت کردار ادا کرنا چاہیے۔ میری سمجھ میں یہ بات نہیں آتی ہے کہ ٹیم کے ہارنے کی صورت میں میڈیا ایسے کریکٹرز کو تبصرے کیلئے سامنے لاتا ہے جن کا اپنا ڈسپلن ساری زندگی خراب رہا ہے اور خود گروپ میں ملوث رہے ہیں۔’ شاہد آفریدی نے اس بارے میں مزید کہا کہ جب ہم ہارتے ہیں تو میڈیا ایسے لوگوں کو کیوں لیکر آتا ہے، اچھے لوگوں کو بھی لانا چاہیے جو عوام کو اچھی اور مثبت بات بتا سکیں۔ ٹیم میں شامل نئے کھلاڑی بلاول بھٹی کے بارے میں پوچھے گئے ایک سوال کے جواب میں شاہد آفریدی نے کہا کہ ابھی بلاول بھٹی کا عبدالرزاق یا کسی اور سے موازنہ کیا جانا بہت جلدی ہے، ابھی آگے دباو میں بہت کرکٹ کھیلنا ہے۔ قومی کرکٹر شاہد آفریدی کا کہنا ہے کہ ابوظہبی سیریز جیتنی چاہیے تھی، جنوبی افریقہ کواس کے گراونڈ پر ہرانا اچھی بات ہے، مشکل وقت میں ٹیم کی حوصلہ افزائی اور ساتھ دینا چاہیے۔ شاہد آفریدی کا کہنا تھا کہ احمد شہزاد اور مقصود نے اچھا کھیل کا مظاہرہ کیا، جنوبی افریقہ میں سیریز کی کچھ لوگوں نے مخالفت کی تھی، ورلڈ کپ سے پہلے اچھا پرفارم کرنا ضروری ہے، انہوں نے میڈیا پر تنقید کرتے ہوئے کہا کہ میڈیا کو اپنا مثبت کردار ادا کرنا چاہیے، میڈیا کے لوگ اچھے لوگوں کا ذکر کیوں نہیں کرتے، میڈیا میں ہیکل جیکل بیٹھے ہوئے ہیں۔ ان کا کہنا تھا کہ میڈیا پر بیٹھے ہوئے ہیکل جیکل نے ٹیم کے حوصلے پست کئے، بلاول بھٹی، انورعلی اور صہیب مقصود نے شاندار کارکردگی کا مظاہرہ کیا۔

کراچی: سول ایوی ایشن اسکول کی ٹیچر پرنسپل کی ڈانٹ سے دل برداشتہ ہو کر انتقال کرگئیں، جس پر سول ایوی ایشن اسکولوں کے اساتذہ نے مظاہرہ اور احتجاج کیا۔ ان کا مطالبہ تھا کہ پرنسپل کے خلاف کارروائی کی جائے۔ڈپٹی ڈائریکٹر جنرل کی جانب سے تحقیقات کی یقین دہانی کے بعد اساتذہ نے احتجاج ختم کرنے کا اعلان کردیا، تاہم اساتذہ نے خبردار کیا ہے کہ اسکول ایڈمنسٹریٹر اور پرنسپل کے خلاف کارروائی نہ کی گئی تووہ ہڑتال کردیں گے۔کراچی کے اولڈ ایئرپورٹ روڈ پردھرنا دینے والی سول ایوی ایشن اسکول کی استانیوں نے ایڈمنسٹریٹر اور پرنسپل کے خلاف احتجاج کرتے ہوئے ان کے خلاف کارروائی کا مطالبہ کیا۔ ان کا کہنا تھا کہ پرنسپل کی سرعام ڈانٹ ڈپٹ سے دلبرداشتہ ہو کر ان کی ساتھی ٹیچر انتقال کرگئیں۔مرحومہ شہناز افضل کی ہمشیرہ کا کہنا تھا کہ پرنسپل عطیہ کمال نے ظلم کی انتہا کردی۔ وہ انہیں کبھی معاف نہیں کریں گی۔ اساتذہ کے احتجاج نے شدت اختیار کی تو ڈپٹی ڈائریکٹر جنرل سول ایوی ایشن خاور حسین ایکشن میں آئے اور مظاہرین کو تحقیقات کی یقین دہانی کرائی۔ تین گھنٹے سے زائد تک جاری رہنے والے احتجاجی دھرنے کے سبب سی اے اے اسکولوں میں تدریسی عمل معطل رہا۔ڈی ڈی سول ایوی ایشن کی یقین دہانی پر اساتذہ نے احتجاج ختم تو کردیا تاہم انہوں نے خبردار کیا کہ اگر ایڈمنسٹریٹر اور پرنسپل کے خلاف کارروائی نہ کی تو وہ اپنا احتجاج دوبارہ شروع کردیں گی اور اسکولوں میں ہڑتال کی جائے گی۔

لاہور: لاہور میںقومی کرکٹرر وہاب ریاض کے ولیمے کی تقریب کا انعقادہوا۔شادی کے بندھن میں بندھنے کے بعد وہاب ریاض اپنی شریک حیات کے ساتھ ولیمے کی تقریب میں شرکت کے لئے آئے تو زندگی کا نیا سفر شروع کرنے پر دونوں کے چہرے خوشی سے دمک رہے تھے۔مشرقی لباس میں سجی سنوری دلہن اورسوٹ میں ملبوس وہاب ریاض ہنستے مسکراتے چہروں کے ساتھ عزیزو اقارب اور دوستوں کے ساتھ تصاویر بنواتے ر ہے اور کرکٹ اسٹار نے شادی کو اپنے کیرئیر کے لئے نیک شگون قرار دیا۔وہاب ریاض کی دعوت ولیمہ میں شریک کرکٹرز نے بھی ان کے لئے نیک خواہشات کا اظہارکیا۔وہاب ریاض نے ارادہ ظاہر کیا کہ شادی کی مصروفیات سے فراغت کے بعدبہت جلد کھیل کے میدان میں نظرآئیں گے۔

لاہور: دورہ جنوبی افریقہ سے واپسی پرمحمد حفیظ کا کہنا تھا کہ ایک دو میچزمیں خراب کارکردگی پر تنقید کرنا درست نہیں ،عالمی رینکنگ میں آٹھویں نمبرپرہوں ،کارکردگی اتنی بری بھی نہیں ہے۔ دورہ جنوبی افریقہ کے بعد لاہور ائیرپورٹ پر میڈیا سے گفتگو کرتے ہوئے ٹی ٹوئنٹی ٹیم کے کپتان محمد حفیظ کا کہنا تھا کہ ٹی ٹوئنٹی فارمیٹ میں ٹیم کی پرفارمنس بہتر رہی۔ وہ پروٹیز کیخلاف ون ڈے سیریز جیتنے پرقوم کومبارکباد پیش کرتے ہیں۔ ایک سوال پر محمد حفیظ کا کہنا تھا کہ وہ عالمی رینکنگ میں آٹھویں نمبرپرہیں۔ انکی پرفارمنس اتنی بری بھی نہیں،ایک دو میچز میں خراب پرفارمنس پر تنقید کرنا درست نہیں ہے۔ ایک صحافی نے قوم کو خوش کرنے کیلئے محمد حفیظ کو شادی کا مشورہ ہی دے ڈالا جس پر حفیظ کے چہرے کا رنگ اڑ گیا۔

کراچی: معذوروں کے عالمی دن کی مناسبت سے آج (منگل ) وہیل چیئر کرکٹ میچ اصغر علی شاہ اسٹیڈیم میں کھیلا جائے گا۔ وہیل چیئر کرکٹ ایسوسی ایشن الیون کی قیادت محمد ذیشان کریں گے جبکہ اصغر علی شاہ الیون کی قیادت کے فرائض محمد ایوب انجام دیں گے ۔کھلاڑیوں میں سید اعجاز احمد ،محمد بشیر ،شکیل میمن ،ابراہیم ،رضوان ،وسیم ،فرحان ،محمد عابد،محمد عرفان ،صدام ،ندیم چاندنی ،عرفان سلیمان ،ندیم اور سعید شامل ہیں ۔ اصغر علی شاہ الیون ٹیم کے منیجر کوچ اکرام اللہ جبکہ وہیل چیئر ایسوسی ایشن ٹیم کے منیجر کوچ میر نشاط احمد اور کوچ خالد حمید ہوں گے۔