شر پسند عناصر ملک سے پولیو کے خاتمے کی مہم کو روکنے میں ہمیشہ ناکام رہیں گے، وزیراعظم

اسلام آ باد /کو ئٹہ(پی پی آ ئی)وزیراعظم شہباز شریف نے کہا ہے کہ شر پسند عناصر ملک سے پولیو کے خاتمے کی اس مہم کو روکنے میں ہمیشہ ناکام رہیں گے۔ وزیرِ اعظم شہباز شریف نے بلوچستان کے نواحی علاقے بلیلی میں پولیو ٹیم کی حفاظت پر مامور پولیس کی گاڑی پر دھماکے کی مذمت کی اور واقعے کی فوری تحقیقات کی ہدایت سمیت زخمیوں کو بہترین طبی سہولیات فراہم کرنے کی بھی ہدایت کی ہے۔وزیراعظم نے کہا ہے کہ واقعے میں پولیس اہلکار سمیت اور ایک بچے کی شہادت پر دلی دکھ اور رنج ہوا کیونکہ پولیو اہلکار ملک سے موذی مرض کے خاتمے کیلئے جان کی پرواہ کئے بغیر یہ فریضہ سر انجام دے رہے ہیں۔انہوں نے کہا کہ شر پسند عناصر ملک سے پولیو کے خاتمے کی اس مہم کو روکنے میں ہمیشہ ناکام رہیں گے کیونکہ پاکستانی قوم، قانون نافذ کرنے والے ادارے اور پولیو اہلکار شرپسند عناصر کی ان مزموم کوششوں کو کبھی کامیاب نہیں ہونے دیں گے۔ ملک سے پولیو کا مکمل خاتمہ حکومت کی اولین ترجیحات میں شامل ہے اور ملک سے پولیو کے خاتمے تک چین سے نہیں بیٹھے گے۔