ناانصافی قوموں کو تباہی سے دوچار کرتی ہے: عمران خان

لاہور(پی پی آ ئی) پی ٹی آ ئی چیئر مین عمران خان نے سلمان شہباز کی وطن واپسی پر رد عمل دیتے ہو ئے کہا کہ پاکستان میں ایک جا نب 75سالہ سینیٹر اعظم سواتی کوتشدد کا نشانہ بنایا گیا،جبکہ سلمان شہباز کو این آر او،ٹو کے ذریعے جھاڑ پونچھ کر پاک صاف کر دیا گیا۔اپنے ٹو ئٹڑ پیغام میں عمران خان نے لکھا ہے کہ”اگر کوئی یہ سمجھنا چاہتا ہے کہ پاکستان کی معیشت تباہی کے نرغے میں کیوں ہے تو محض دو واقعات ہی اس کیلئے کافی ہیں۔ 75 سالہ سینیٹر اعظم سواتی کو زیرِحراست تشدد کا نشانہ بنایا گیا،انہیں انکے پوتے پوتیوں کے سامنے پیٹا گیا، ایک حصے کو گرا کر انکے گھر پر جبراً تالے چڑھائے گئے اورقوانین کو مکمل طور پر نظر انداز، ہمارے دستور میں فراہم کردہ بنیادی انسانی حقوق کو صریحاً پامال کرتے ہوئے درج کئے گئے درجنوں مقدمات کے ذریعے انہیں ایک سے دوسرے صوبے میں گھسیٹنے کا سلسلہ جاری ہے۔اسکے برعکس اربوں روپے کی کرپشن اور منی لانڈرنگ میں ملوث سلمان شہباز کواین آر او،ٹو کے ذریعے جھاڑ پونچھ کر پاک صاف کر دیا گیا ہے اور وہ پاکستان لَوٹ آیا ہے۔ رسولِ مکرّم ﷺکی وہ حدیثِ مبارکہ ہر کسی کے پیشِ نظر رہنی چاہئیے جس میں انہوں نے تنبیہ کی تھی کہ ناانصافی کیسے قوموں کو تباہی سے دوچار کرتی ہے!“۔