وزیراعظم شہبازشریف سے مصر کی کاروباری شخصیت نجیب ساویرس کی ملاقات

اسلام آباد (پی پی آئی)وزیر اعظم محمد شہباز شریف نے کہا ہے کہ پاکستان میں انفارمیشن ٹیکنالوجی، ٹیلی مواصلات، توانائی، زراعت، فوڈ پراسیسنگ، لائیو اسٹاک، سیاحت اور قدرتی وسائل کے شعبوں میں سرمایہ کاری کے بے پناہ مواقع موجود ہیں، حکومت سرمایہ کار دوست پالیسیوں پر عمل پیرا ہے، غیر ملکی سرمایہ کاروں کو سرمایہ کاری کیلئے تمام تر سہولیات فراہم کی جائیں گی۔پی پی آئی کے مطابق ان خیالات کا اظہار انہوں نے مصر کی ممتاز کاروباری شخصیت نجیب ساویرس کی زیر قیادت وفد سے گفتگو کرتے ہوئے کیا جس نے جمعہ کو یہاں ان سے ملاقات کی۔ وزیر اعظم نے نجیب ساویرس اور ان کے وفد کو پاکستان میں خوش آمدید کہانجیب ساویرس نے کہا کہ ان کا بزنس گروپ پاکستان میں ٹیلی کمیونیکشن اور رئیل اسٹیٹ کے شعبوں میں کامیاب سرمایہ کاری کر چکا ہے۔ انہوں نے پاکستان میں مزید شعبوں خصوصاً کان کنی کے شعبے میں سرمایہ کاری میں دلچسپی کا اظہار کیا۔