بھارت میں میرے سر کی قیمت دو کروڑ روپے لگائی گئی ہے:بلاول بھٹو

واشنگٹن(پی پی آ ئی)وزیر خارجہ بلاول بھٹو نے بھارتی وزیراعظم نریندر مودی کو گجرات کا قصائی کہنے کے بیان کا دفاع کیا ہے۔واشنگٹن میں امریکی ٹی وی بلوم برگ کو انٹرویو دیتے ہوئے بھارت سے متعلق سوال پر بلاول بھٹو نے کہا کہ بھارتی وزیراعظم سے متعلق تاریخی حقیقت دہرائی ہے، اپنے بیان پر قائم ہوں، مودی گجرات کا قصائی ہے۔ بھارت میں میرے سر کی قیمت دو کروڑ روپے لگائی گئی ہے، اس سے ثابت ہوا کہ میں نے جو کہا تھا وہ درست ہے، مودی حکومت بھارت میں مسلمانوں پر تشدد کررہی ہے۔واضح رہے اقوام متحدہ میں بلاول بھٹو زرداری نے بھارتی وزیر خارجہ جے شنکر کے الزامات کا جواب دیتے ہوئے کہا تھا کہ اسامہ بن لادن مر چکا ہے لیکن گجرات کا قصائی زندہ ہے اور وہ بھارت کا وزیر اعظم ہے۔