بولان میں ریلوے ٹریک پر دھماک، بوگیاں ٹریک سے اتر گئیں،متعددمسافر زخمی

کوئٹہ (پی پی آ ئی) بلوچستان کے ضلع بولان کے علاقے پنیر میں ریلوے لائن پر دھماکے سے ٹرین کی بوگیاں پٹڑی سے اتر گئیں، جس کے نتیجے میں متعدد افراد زخمی ہیں۔پولیس حکام کے مطابق دھماکا سبی اور مچھ کے درمیان پنیر اسٹیشن کے قریب ہوا، اور دھماکا اس وقت ہوا جب جعفر ایکسپریس پنیر اسٹیشن پہنچ رہی تھی، تاہم خو شقسمتی سے ٹرین چند لمحوں بعد ٹریک تک پہنچی، دھماکے سے پٹریاں ٹوٹ گئیں اور جعفر ایکسپریس کی بوگیاں ٹریک سے اتر گئیں، جس کے باعث متعدد مسافرزخمی ہوگئے۔ ڈپٹی کمشنر بولان کچھی آغا سمیع اللہ کے مطابق کوئٹہ سے پشاور جانیوالی جعفر ایکسپریس کو دھماکہ خیز مواد سے اڑانے کی کوشش کی گئی، انجن سمیت آٹھ بوگیاں پٹڑی سے اتر گئیں۔ڈپٹی کمشنر بولان کے مطابق ابتدائی اطلاعات کے مطابق متعدد افراد زخمی ہیں، زخمیوں کو اسپتال منتقل کردیا گیا، جب کہ دیگر مسافروں کو بحفاظت ٹرین سے اتار کر محفوظ مقام پر منتقل کردیا گیا۔دوسری جانب وزیراعلیٰ بلوچستان میر عبدالقدوس بزنجو نے جعفر ایکسپریس کو دہشت گردی کا نشانہ بنانے کے واقعہ کی مذمت کی ہے۔ وزیراعلیٰ نے ڈپٹی کمشنر کچھی اور سبی کو فوری طور پر ریسکیو سرگرمیوں کے آغاز اور متاثرہ مسافروں کو ہر ممکن معاونت فراہم کرنے کی ہدایت کی ہے۔