تحریک انصاف نے عوام کو شعور دے دیا، وہ بیدار ہو چکے ہیں،کسی جھانسہ میں نہیں آئیں گے
حقیقی آزادی اور ترقی کے لیے عمران کے ہاتھ مضبوط کرنا ہوں گے: سابق وزیر اعلیٰ پنجاب
لاہور (پی پی آئی) پاکستان تحریک انصاف کے رہنما و سابق وزیر اعلیٰ پنجاب چوہدری پرویز الٰہی نے کہا ہے کہ حقیقی آزادی اور پاکستان کی ترقی کے لیے عمران خان کے ہاتھ مضبوط کرنا ہوں گے۔انہوں نے کہا کہ پی ڈی ایم اپنی ناکام سیاست بچانے، مخالفین پر دباؤ کیلئے جھوٹے مقدمے درج کرا رہی ہے، نااہل حکمران ملک کی معیشت اور امن کیلئے سب سے بڑا خطرہ ہیں۔پی ٹی آئی رہنما نے کہا کہ اداروں پر دباؤ ڈال کر اپنی مرضی کی کارروائیاں کرنے کی اجازت ہرگز نہیں دی جائے گی، اب عوام کو عمران خان نے شعور دے دیا اور وہ بیدار ہو چکے ہیں۔پرویز الٰہی نے کہا کہ وفاقی اور نگراں حکومت یاد رکھے ان کو پنجاب اور کے پی میں الیکشن 90 دن میں کروانے ہوں گے، صدر عارف علوی نے تاریخ دے کر بے مثال کام کیا ہے۔