مقبوضہ کشمیر،قابض بھارتی فوجیوں نے فروری میں 5 کشمیری نوجوانوں کو شہید کیا

سری نگر(پی پی آ ئی) بھارت کے زیر قبضہ جموں و کشمیر میں قابض بھارتی فوجیوں نے اپنی ریاستی دہشت گردی کی مسلسل کارروائیوں میں گزشتہ ماہ فروری میں 5 بے گنا کشمیری نوجوانوں کو شہید کیا۔کشمیر میڈیا کے مطابق شہید ہونے والوں میں سے دو نوجوانوں کو دوران حراست شہید کیا گیا،اس دوران بھارتی فورسز نے محاصرے اور تلاشی کی 193 کارروائیوں میں پرامن مظاہرین پر طاقت کا وحشیانہ استعمال کرکے 115 نوجوانوں کو گرفتار اور کم از کم 7افرادکو زخمی کردیا۔بھارتی پولیس نے ضلع کٹھوعہ کی نگری پولیس چوکی پر ایک گرفتار شہری سونو کمار کو بھی تشدد کا نشانہ بناکر ہلاک کردیا۔بھارتی فورسز کے اہلکاروں نے ایک مکان اور ایک مسجد کو بھی نقصان پہنچایا۔دریں اثناچار ہزار سے زائد حریت رہنما، کارکن، نوجوان، طلبااور انسانی حقوق کے کارکن بھارت اور مقبوضہ جموں وکشمیر کی مختلف جیلوں میں مسلسل نظربند ہیں جن میں کل جماعتی حریت کانفرنس کے چیئرمین مسرت عالم بٹ، محمد یاسین ملک، شبیر احمد شاہ، آسیہ اندرابی، ناہیدہ نسرین، فہمیدہ صوفی، نعیم احمد خان اور ایک درجن سے زائدکشمیری خواتین سیاسی کارکن شامل ہیں۔ ان لوگوں کومن گھڑت الزامات پر انتقامی کاررائیوں کا نشانہ بنایاجارہا ہے اور ان کے شہری حقوق پامال کئے جارہے ہیں۔