پاکستان زرعی مصنوعات برآمدکرنے کی استعداد رکھتا ہے:احسن اقبال

سکھر(پی پی آئی) وفاقی وزیر منصوبہ بندی، ترقی و اصلاحات پروفیسر احسن اقبال نے کہا ہے کہ ہمیں اپنی زرعی پیداوار کو نئے مواقع ور آنے والے خطرات سے ہم آہنگ کرنا ہوگا،زرعی پیداوار بڑھانے کیلئے موسمیاتی تبدیلیوں کے خلاف مزاحمت رکھنے والے بیج استعمال کرنا ہونگے۔ ایک کسان وفد سے ملاقات میں ان کا کہنا تھاکہ نجی سیکٹر کی ذمہ داری ہے کہ وہ برآمدات کے شعبے میں مستعد کردار ادا کرے۔ حکومت نجی شعبے کے ساتھ ہر قسم کا تعاون کریگی۔ انہوں نے کہا کہ پاکستان ایک زرعی ملک ہونے کے ناطے زرعی مصنوعات کی برآمدات میں استعداد رکھتا ہے۔ ڈیری مصنوعات کی پیداوارمیں پاکستان کا دنیا میں پانچواں نمبر ہے،ہمیں اس شعبے پربھی خصوصی توجہ دینا ہوگی۔ سیلاب سے پاکستان کو اربوں ڈالر کے نقصان کا سامنا کرنا پڑا، پاکستان کوماحولیاتی تبدیلیوں کے پیش نظر پائیدارحکمت عملی اپنانا ہوگی۔