اسلحہ نہیں قلم،کتاب وقت کی ضرورت ہے، بھٹکے ہوئے نوجوا ن سوچ بدلیں
بلوچستان کا نوجوا ن باشعور ہو چکا ہے،اسے اپنے اچھے برے کی پہچان ہے
کوئٹہ (پی پی آئی) سینیٹر ثمینہ ممتاز زہری نے کہاہے کہ کسی بھی قوم میں نوجوان طبقہ ریڑھ کی ہڈی کی حیثیت رکھتا ہے اور مستقبل کے لئے نوجوانوں کی صحیح سمت رہنمائی ہم سب کی قومی ذمہ داری ہے۔نوجوان ہمارے روشن مستقبل کے ضامن اور ہمارا سرمایہ ہیں بلوچستان کی دیرپا اور تیز رفتار ترقی میں نوجوانوں کا اہم کردار ہے۔ پی پی آئی کے مطابق انہوں نے نوجوانوں کے وفد سے گفتگوکرتے ہوئے کہاکہ بندوق کے زور پر کبھی حقوق حاصل نہیں کئے جاسکتے بندوق کی بجائے قلم وقت کی ضرورت ہے آج کا نوجوا ن باشعور ہو چکا ہے اوراسے اپنے اچھے برے کی پہچان ہے ثمینہ زہری نے کہا کہ ہمارے چند ناراض اور بھٹکے ہوئے نوجوان دوسروں کے بہکاوے میں ا کر غلط راہ پر چل رہے ہیں جو سراسر دھوکہ اور سراب ہے ضرورت اس امر کی ہے کہ ان نوجوانوں کو صحیح سمت دکھائی جائے اور وطن سے محبت اور اس کے لئے اپنی صلاحیتیں بروئے کار لانا ہی صحیح سمت ہیہم امید کرتے ہیں کہ بھٹکے ہوئے نوجوان اپنے دل کی آواز سنیں گے اپنی سوچ کو بدلیں گے اور دشمنوں کی چالوں میں نہیں آئیں گے۔