پاکستان اپنی زندگی کے سنگین ترین اورگھمبیرترین آئینی بحران سے گزر رہا ہے: شیخ رشید

را ولپنڈی(پی پی آ ئی) عوامی مسلم لیگ کے سر براہ شیخ رشید نے کہا ہے کہ پاکستان اپنی زندگی کے سنگین ترین اورگھمبیرترین آئینی بحران سے گزر رہا ہے،پاکستان دنیا کاواحد ملک ہے جو عدلیہ سے ٹکرا رہاہے اور الیکشن سے بھاگ رہاہے۔ سماجی را بطے کی ویب سائٹ ٹو ئٹر پر اپنے بیان میں سا بق وزیر داخلہ شیخ رشید نے کہا کہ سارا ملک اورسارے آئینی ادارے بند گلی میں داخل ہوچکے ہیں۔عدلیہ کوشش کررہی ہے کہ معاملات شاہراہ جمہوریت پرافہام وتفہیم سے حل ہوں، نگران حکومتیں کٹی ہوئی پتنگ ہیں جسکے90روز پورے ہو چکے ہیں 27کلومیٹر کی حکومت اور اسکے حواری آرٹیکل6کے یڈار میں آچکے ہیں۔انہوں نے کہا کہ غریب ڈیفالٹ ہو چکا ہے ملک قرضوں کی بھینٹ چڑھ کر شاید ڈیفالٹ سے بچ جائے۔شیخ رشید نے کہا کہ پوری امید ہے کہ سٹیٹ بنک الیکشن کمیشن کو 21ارب روپے فوری منتقل کریگا۔چیف آف آرمی سٹاف ٹھیک کہتا ہے کہ مسئلہ نئے اور پرانے پاکستان کا نہیں حقیقی پاکستان کا ہے جس میں غریب سسکیاں لے رہا ہے اورجمہوریت دم توڑ رہی ہے۔ ہر روز کابینہ ایسے بیٹھتی ہے جیسے نیاز بانٹی جا رہی ہو لیکن نتیجہ صفر ہے۔شیخ رشید نے کہا کہ آصف زرداری شہباز شریف کو نااہل کر وا کے بلاول بھٹو کو وزیر اعظم بنا نا چا ہتا ہے، پی ڈی ایم ٹوٹ پھوٹ کاشکار ہے۔