عید پر 5 فلمیں ریلیز، کراچی کے سینماؤں میں گہماگہمی

کراچی(پی پی آئی)پاکستان بھر میں عید الفطر کے موقع پر 5 فلمیں ریلیز کی گئی ہیں جس کے باعث سینماؤں میں گہماگہمی دیکھنے میں آرہی ہے۔ ان فلموں میں سے ایک سابق کرکٹر وسیم اکرم اور ان کی اہلیہ شہنیرا اکرم کی پہلی ڈیبیو فلم ”منی بیک گارنٹی“ ہے فلم کی کہانی ایک بینک ڈکیتی کے گرد گھومتی ہے،۔پی پی آئی کے مطابق ماضی کے مقبول ہیرو شاہد کے بیٹے اور صحافی کامران شاہد کی فلم ”ہوئے تم اجنبی“ کی کہانی 1971 کی جنگ اور سقوط ڈھاکا کے دوران محبت کی ان کہی داستانوں کے گرد گھومتی ہے۔ فلم میکنگ میں جلد ہی اپنا نام بنانے والے ابو علیحہ کراچی کی جرائم کی دنیا پر ایکشن تھرل فلم ”دلدل“ لائے ہیں۔ ابوعلیحہ کراچی کے حالات سے بخوبی واقف ہیں بلکہ کسی حد تک اس کا شکار بھی ہوئے ہیں۔ یہی وجہ ہے کہ کراچی کی سیاست اور حالات میں دلچسپی رکھنے والے فلم دلدل میں خاصی دلچسپی لے رہے ہیں۔اسی طرح ندیم چیمہ کی ایکشن اور کامیڈی سے بھرپور فلم ”دوڑ“ اور پنجابی فلم ”لاہور قلندر“ بھی عید پر سینماؤں کی زینت بنی نیز بلال لاشاری کی بلاک بسٹر فلم ’دی لیجنڈ آف مولا جٹ‘ کو اس عید پر دوبارہ انٹرنیشنل مارکیٹ میں ریلیز کیا گیاہے۔