کراچی(پی پی آئی) قومی امن کمیٹی برائے بین المذاہب ہم آہنگی حکومت پاکستان ہیومن رائٹس ونگ کراچی ڈویژن کے صدر جمشید انصاری،جنرل سیکریٹری اصغر علی شیخ،نائب صدر امہ حبیبہ نے کہا ہے کہ کراچی شہر کا کوئی بھی علاقہ رہزنوں،ڈکیتوں اور اسٹریٹ کرمنلز سے محفوظ نہیں ہے۔آئے دن کراچی کے شہری اور کاروباری طبقے کے افراد اپنی جان سے ہاتھ دھو بیٹھتے ہیں حالانکہ کراچی کے ہر علاقے میں پولیس اسٹیشنز اور اہلکاروں کی تعداد جابجا نظر آتی ہے۔پی پی آئی کے مطابق انھوں نے آئی جی سندھ سے اپیل کی کہ شہر میں فرض شناس افسران کو عوام کی حفاظت کے لئے مامور کریں تا کہ شہر کا امن سکون بحال کرنے میں مدد مل سکے اور کراچی کی رونقیں بحال ہوں اور شہری بلا خوف و خطر اپنے معمولات زندگی گزار سکیں.