پاکستان مستقبل قریب میں گندم،چاول برآمد کرنے کی صلاحیت رکھتا ہے،وزیرخوراک

 اسلام آباد (پی پی آئی)قومی تحفظ خوراک کے نگران وزیر ڈاکٹر کوثر عبد اللہ ملک نے کہا ہے کہ ملک میں گندم کی کوئی کمی نہیں ہے۔جمعہ کے روزاسلام آباد میں قومی کسان کنونشن سے خطاب کرتے ہوئے انہوں نے کہاکہ مستقبل قریب میں پاکستان گندم، چاول اور دیگر ضروری اشیائے خوردنی برآمد کرنے کی بھرپور صلاحیت رکھتاہے۔انہوں نے کہا کہ حکومت گندم کی پیداوار بڑھانے اور پیداواری فرق کم کرنے کیلئے عملی اقدامات کررہی ہے۔وزیر نے کہا کہ زراعت معیشت کی ریڑھ کی ہڈی ہے اور اس کی راہ میں حائل رکاوٹیں ترجیحی بنیادوں پر دور کی جائیں گی۔انہوں نے کہا کہ پیداواری صلاحیت میں اضافہ کرکے پاکستان باآسانی زراعت کے شعبے میں برآمدی ملک بن سکتاہے۔کوثر عبد اللہ ملک نے کسانوں کو یقین دلایا کہ ملک کے کاشتکاروں کو سہولیات فراہم کرنے کیلئے تمام کوششیں کی جارہی ہیں۔