مقبوضہ کشمیر کے ممتاز عالم دین مولانا حافظ محمد عبدالطیف بٹ انتقال کر گئے

سرینگر(پی پی آئی) مقبوضہ جموں وکشمیر  کے ممتاز عالم دین مولانا حافظ محمد عبدالطیف بٹ انتقال کر گئے۔ مولانا حافظ محمد عبدالطیف کئی برس سے سرینگر کے علاقے زینہ کدل کی مسجد میں امامت و خطابت کے فرائض انجام دے رہے تھے۔ مرحوم انتہائی حلیم الطبع اور منکسرالمزاج انسان تھے۔دریں اثنا مقبوضہ جموں وکشمیر کے مفتی اعظم مفتی ناصر الاسلام نے حافظ محمد عبدالطیف کے انتقال پر گہرے دکھ اور افسوس کا اظہار کرتے ہوئے غم زدہ لواحقین کیساتھ دلی تعزیت کا اظہار کیا ہے۔ انہو ں نے مرحو م کے درجات کی بلندی کیلئے دعا کی۔ پی پی آئی کے مطابق  جموں کشمیر ڈیموکریٹک یوتھ فورم کے چیئرمین محمد حذیفہ کی قیادت میں تنظیم کا ایک وفد غمز دہ خاندان کیساتھ اظہار تعزیت کیلئے سرینگر میں مرحوم کے گھر گیا۔ وفد نے مرحوم کے درجات کی بلندی اور لواحقین کیلئے صبر جمیل کی دعا کی۔