غلط فیصلہ کرنے پرسنجے ہزارے کو آئی پی ایل میں امپائرنگ سے روک دیا گیا

نئی دہلی: انڈین پریمئیر لیگ میں میچ کے دوران سنگین غلطی کرنے پر بھارتی امپائر سنجے ہزارے کو ایونٹ کے بقیہ میچوں میں امپائرنگ کرنے سے روک دیا گیا۔امپائر سنجے ہزارے نے راجھستان اور دہلی کے درمیان کھیلے گئے میچ میں بیٹسمن کیون پیٹرسن کے رن آﺅٹ کے معاملے پر تیسرے امپائر سے رجوع کرنے سے گریز کیا تھاجبکہ ٹی وی ریپلے میں بیٹسمن کیون پیٹرسن آﺅٹ نظر آرہے تھے۔ چئیرمین آئی پی ایل رانجیب بسوال کا کہنا ہے کہ اس معاملے پر قائم کردہ کمیٹی نے سنجے ہزارے کوایونٹ کے بقیہ میچوں میں امپائرنگ کرنے سے روک دیا ہے۔ سنجے ہزارے نے اپنی غلطی کا اعتراف کرلیا ،ان کا کہناہے کہ اس موقع پر تیسرے امپائر سے رجوع نہ کرنا غلطی تھی اور انسان سے غلطی ہوسکتی ہے ۔سنجے ہزارے اب تک آئی پی ایل کے17میچوں میں امپائرنگ کے فرائض انجام دے چکے ہیں۔