سندھ کے تیسرے بڑے شہر میں سکھر واٹر اینڈ سیوریج کارپوریشن بورڈ قائم

سکھر(پی پی آئی)سندھ کے تیسرے بڑے شہر میں سکھر واٹر اینڈ سیوریج کارپوریشن بورڈ قائم کردیاگیا ہے۔دریائے سندھ کے کنارے آباد شہر سکھر میں پانی کا مسئلہ حل  کرنے کے لیے نگران سندھ حکومت نے منتخب میئرکی سربراہی میں سکھر واٹر اینڈ سیوریج کارپوریشن بورڈ تشکیلدیا ہے۔ پی پی آئی کے مطابق کراچی واٹر اینڈ سیوریج بورڈ، حیدرآباد واٹر اینڈ سیوریج اتھارٹی کے بعد سندھ کے تیسرے بڑے شہر میں سکھر واٹر اینڈ سیوریج کارپوریشن بورڈ قائم کردیاگیا۔محکمہ سروسز جنرل ایڈمنسٹریشن اینڈ کوآرڈی نیشن کے نوٹی فیکشن کے مطابق میئر سکھر کی سربراہی میں 16 رکنی سکھر واٹر اینڈ سیوریج بورڈ میں 9 سرکاری اور 7 غیرسرکاری ممبران شامل ہوں گے۔میئر کی عدم موجودگی میں ایڈمنسٹریٹر سکھر میٹروپولیٹن کارپوریشن اس بورڈ کے چیئرمین ہوں گے۔سیکریٹری خزانہ اور منصوبہ بندی وترقیات کے نامزد گریڈ انیس کے 2 افسربھی بورڈ کے ممبر ہوں گے۔