ادویات کی قیمتوں میں اضافہ قبول نہیں، غریب مریضوں پر مزید بوجھ پڑے گا:پی ایم اے

کراچی(پی پی آئی)پاکستان میڈیکل ایسوسی ایشن (پی ایم اے) نے ڈرگ ریگولیٹری اتھارٹی آف پاکستان (ڈریپ) کی جانب سے ادویات کی قیمتوں میں اضافے کی حالیہ تجویز کی شدید مذمت کی ہے۔ پی پی آئی کے مطابق  پاکستان میڈیکل ایسوسی ایشن سینٹرکے اعزازی سیکریٹری جنرل ڈاکٹر عبدالغفور شورونے اس اقدام پر سخت تنقید کرتے ہوئے کہا کہ یہ غریب مریضوں پر مزید بوجھ کا سبب بنے گا۔اس فیصلے کے ممکنہ منفی اثرات کے حوالے سے اپنے تحفظات کا اظہار کیا۔ انہوں نے اس بات پر زور دیا کہ ادویات کی قیمتوں میں اضافہ صحت کی دیکھ بھال کو آبادی کے ایک اہم حصے کیلئے ناقابل رسائی بنا دے گا، خاص طور پر وہ لوگ جو پہلے ہی ضروری علاج کی استطاعت  نہیں رکھتے۔ایسوسی ایشن نے اس بات پر بھی روشنی ڈالی کہ مجوزہ اضافہ جعلی ادویات میں اضافے کا باعث بن سکتا ہے، کیونکہ لوگ زیادہ لاگت کی وجہ سے سستے متبادل کی تلاش کر سکتے ہیں۔ اس سے مریضوں کی صحت کو سنگین خطرات لاحق ہو سکتے ہیں، کیونکہ جعلی ادویات اکثر ضروری معیار اور تاثیر سے محروم ہوتی ہیں۔پاکستان میڈیکل ایسوسی ایشن نے ایسی تجویز پیش کرنے سے قبل اسٹیک ہولڈرز کی مشاورت کی کمی پربھی تنقید کی۔ انہوں نے مزید جامع اور شفاف فیصلہ سازی کے عمل پر زور دیا، جس میں صحت کی دیکھ بھال کے پیشہ ور افراد، مریضوں اور دیگر متعلقہ اسٹیک ہولڈرز شامل ہوں۔ایسوسی ایشن نے حکام پر زور دیا کہ وہ اس فیصلے پر نظر ثانی کریں اور ایسے اقدامات اپنائیں جو تمام شہریوں کے لیے معیاری ادویات تک سستی رسائی کو یقینی بنائیں۔ انہوں نے ملک میں جعلی ادویات کی فروخت اور تقسیم کو روکنے کے لیے سخت ضابطوں کو لاگو کرنے کی اہمیت پر بھی زور دیا۔پاکستان میڈیکل ایسوسی ایشن نے  پاکستان میں ادویات کی سستی فراہمی کے مسئلے سے نمٹنے کیلئے ایک جامع طریقہ کار مرتب کرنے پر زوردیا۔