رمضان سے قبل ہی منافع کور میدان میں ،دالوں کی قیمتوں میں اضافہ

کراچی: رمضان کی آمد سے قبل ہی دالوں کی قیمت میں 10روپے فی کلو تک اضافہ کردیاگیا۔عالمی مارکیٹ میں روپے کی قدرمستحکم ہونے سے درآمدی دالوں کی ہول سیل سطح پر تو قیمتیں کم ہوئی ہیں لیکن ریٹیل سطح پر دالوں کی فی کلو قیمت میں 10 روپے تک کا اضافہ کردیا گیا ہے۔رمضان المبارک کی آمد سے قبل ہی اشیا کی قیمتوں میں اضافہ شروع ہوگیا ہے۔ مارکیٹ ذرائع کے مطابق عالمی مارکیٹ میں دالوں کی قیمتوں میں کمی اور روپے کی قدر مستحکم ہونے کے باوجود مقامی رٹیل مارکیٹوں میں دالوں کی قیمتوں میں کمی نہیں کی گئی۔ رمضان سے قبل ہی منافع خوروں نے مصنوعی قلت کو جواز بناتے ہوئے مختلف دالوں کی قیمتوں میں اضافہ کردیا ہے، مونگ کی دال 10 روپے اضافہ سے 165 روپے کلو کردی گئی،ماش کی دال 8 روپے اضافے سے 128 روپے کلو ہو گئی ہے ،اس کے علاوہ مسور کی دال 5 روپے مہنگی ہوکر 105 روپے کلو جبکہ چنے کی دال 4 روپے اضافہ سے 70 روپے کلو ہوگئی جس کے سبب عوام کیلئے دال روٹی کا حصول بھی مشکل ہو گیا ہے۔