کراچی میں پولیس مقابلے، ایک ڈاکو ہلاک، 2 زخمیوں سمیت 4 گرفتار

کراچی(پی پی آئی)شہر قائد کراچی میں مبینہ پولیس مقابلوں کے دوران ایک ڈاکو ہلاک جبکہ 2 زخمیوں سمیت 4 کو گرفتار کر لیا گیا۔تفصیلات کے مطابق زمان ٹاؤن میں 2 مبینہ ڈاکو شہریوں سے لوٹ مار کرنے میں مصروف تھے کہ اطلاع ملنے پر پولیس پہنچ گئی، پولیس پارٹی کو دیکھتے ہی ملزموں نے فائرنگ شروع کر دی،پی پی آئی کے مطابق پولیس کی جوابی کارروائی کے نتیجے میں ایک ڈاکو مارا گیا جبکہ دوسرا فرار ہو گیا۔دوسری جانب کراچی کے علاقوں تصویر محل چوکی اور صنعتی ایریا میں بھی پولیس کے ساتھ فائرنگ کے تبادلے میں 2 زخمیوں سمیت 4 ملزموں کو حراست میں لے لیا گیا، گرفتار ملزموں سے اسلحہ، چھینے گئے موبائل، نقدی اور دو موٹرسائیکلیں برآمد کر لیں۔گرفتار ملزموں کی شناخت سیف اللہ، نواز، کاشف اور اسماعیل کے ناموں سے ہوئی، ملزم سنگین نوعیت کی مختلف وارداتوں میں پولیس کو مطلوب تھے، پولیس نے ملزمان کو تھانے منتقل کر کے مزید تفتیش شروع کر دی ہے۔