بی جے پی شکست سے خوفزدہ،اسی لئے لیفٹیننٹ گورنر کے اختیارات بڑھائے، اویسی

سری نگر/مقبوضہ کشمیر(پی پی آئی)آل انڈیا مجلس اتحاد المسلمین کے صدر اور رکن بھارتی پارلیمنٹ اسد الدین اویسی نے کہا ہے کہ مودی حکومت نے مقبوضہ جموں وکشمیر کے لیفٹیننٹ گورنر کے اختیارات میں شکست کے خوف سے اضافہ کیا کیونکہ وہ اچھی طرح سے جانتی ہے کہ انتخابات کی صورت میں وہ مقبوضہ جموں وکشمیر میں حکومت تشکیل نہیں دے پائے گی۔ بیرسٹر اویسی نے ”ایکس“ پر لکھا کہ”مودی حکومت چاہتی ہے کہ جموں وکشمیر کی حکومت کمزور رہے۔ انہوں نے کہا کہ جموں و کشمیر تنظیم نو ایکٹ 2019 میں جو ترمیم کی گئی یہ کوئی معمول کی ترمیم نہیں بلکہ اسکے ذریعے ایک منتخب حکومت کے معاملات میں دخل اندازی کی گئی ہے۔اسد الدین اویسی نے کہا کہ بی جے پی نے مقامی حکومت کی اتھارٹی اور اختیارات کم کرنے کے لیے ترامیم کی ہیں۔یا د رہے کہ بھارتی سپریم کورٹ نے 30ستمبر (2024)سے قبل مقبوضہ جموں وکشمیر میں انتخابات کرانے کی ہدایت دی ہے۔