عمران این آر او مانگ رہے ہیں لیکن حکومت نہیں دے گی:فیصل کریم کنڈی

صوابی(پی پی آئی)گورنرخیبرپختونخوا فیصل کریم کنڈی نے کہا کہ بانی پی ٹی آئی عمران خان حکومت سے این آر او مانگ رہے ہیں لیکن حکومت انہیں این آر او نہیں دے گی۔ فیصل کریم کنڈی صوابی میں پی پی رہنما بلال شیرپاؤ کی رہائش گاہ پر اُن کے چچا کے انتقال پر تعزیت کیلئے پہنچے،بعد ازاں میڈیا سے گفتگو کرتے ہوئے گورنر خیبر پختونخوا فیصل کریم کنڈی کا کہنا تھاکہ عدالتوں نے ہی عمران کے مقدمات کا فیصلہ کرنا ہے۔ فیصل کریم کنڈی نے کہا کہ مولانا فضل الرحمان کی جیت ہے کہ اسد قیصر ہر دوسرے دن ان کے در پر حاضر ہوتے ہیں۔عدم اعتماد کی تحریک کے حوالے سے گورنرکا کہنا تھا پی پی عدم اعتماد میں پی ٹی آئی کا ساتھ نہیں دے گی، ہمارا ن لیگ سے اتحاد مضبوط ہے۔