مقبوضہ کشمیر سے ہزاروں میل دور بھارتی جیلوں میں مقیدکشمیری رہنماؤں کے اہلخانہ پریشان

سری نگر/مقبوضہ کشمیر(پی پی آئی)مقبوضہ جموں وکشمیر میں نیشنل کانفرنس کے رہنما اور رکن بھارتی پارلیمنٹ آغا سید روح اللہ مہدی نے بھارتی وزیر داخلہ امیت شاہ کو لکھے گئے خط میں دور دراز کی بھارتی جیلوں میں غیر قانونی طورپر نظر بندکشمیری رہنماؤں کو درپیش اہم مسائل پر  تشویش ظاہر کی ہے۔  بھارتی میڈیاکے مطابق انہوں نے  بیان کیا کہ بڑی تعداد میں کشمیری نوجوانوں کو بغیر مقدمہ چلائے مقید رکھا گیا ہے۔ انہوں نے کہا کہ ان نوجوانوں کو رہا کیا جائے۔ آغا سید روح اللہ نے لکھاجو لوگ وادی کشمیر سے ہزاروں میل دور بھارتی جیلوں میں بند ہیں انکے اہلخانہ سخت پریشان ہیں کیونکہ وہ طویل سفر اور مالی دشواریوں کیوجہ سے اپنے پیاروں کیساتھ ملاقات کیلئے جانے سے قاصر ہیں۔ انہوں نے وزیر داخلہ پر زور دیا کہ وہ نظر بندوں اور انکے اہلخانہ کو درپیش مشکلات کے خاتمے  اورنظر بندوں کی مشکلات کے خاتمہ میں اپنا کردار ادا کریں۔