صدر،وزیراعظم کا سعودی عرب کے ساتھ مضبوط دوستی کیلئے پاکستانی عزم کا اعادہ

اسلام آباد(پی پی آئی) صدر آصف علی زرداری اور وزیر اعظم شہباز شریف نے سعودی عرب کے ساتھ مضبوط دوستی کے پاکستان کے عزم کا اعادہ کیا ہے۔اسلام آباد میں سعودی عرب کے قومی دن کی تقریب سے خطاب کرتے ہوئے صدر آصف علی زرداری نے سعودی عرب کے ساتھ معیشت، تجارت، دفاع، ثقافت، تعلیم اور عوام کے درمیانروابط کے شعبوں میں دوطرفہ تعاون کو مزید مضبوط بنانے کے لیے پاکستان کے عزم کا اعادہ کیا۔اس موقع پر اپنے ٹیلی ویژن پیغام میں وزیراعظم شہباز شریف نے اس بات پر زور دیا کہ دونوں ممالک خطے میں امن، استحکام اور ترقی کے فروغ کے لیے مل کر کام کرتے رہیں گے۔وزیراعظم نے سعودی ولی عہد شہزادہ محمد بن سلمان کی بصیرت اور دور اندیشی کو سراہتے ہوئے کہا کہ سعودی عرب نے اسلامی دنیا کے رہنما کی حیثیت سے ہمیشہ انصاف، مساوات اور امن کے نصب العین کی حمایت کی ہے۔