صدر ااور وزیراعظم کا تعلیم کے فروغ کیلئے تدریسی شعبے کی معاونت کرنے کا پختہ عزم

اسلام آباد(پی پی آئی)صدر آصف علی زرداری اور وزیراعظم محمد شہباز شریف نے تعلیم کے فروغ کیلئے تدریسی شعبے کی معاونت کرنے کا پختہ عزم ظاہر کیا ہے۔صدر مملکت نے اساتذہ کے عالمی دن کے موقع پر اپنے پیغام میں لوگوں پر زور دیا کہ وہ اساتذہ کے عزت و احترام کو یقینی بنانے اور انہیں بااختیار بنانے میں اپنا کردار ادا کریں۔انہوں نے کہا کہ اساتذہ کرام کسی بھی معاشرے میں معمار کی حیثیت رکھتے ہیں جو نوجوان نسل کی ذہنی نشوونما میں اہم کردار ادا کرتے ہیں۔انہوں نے کہا کہ اساتذہ کو ان کے فرائض کی انجام دہی میں آسانی پیدا کرنے کے لئے انہیں جدید ٹیکنالوجی سے روشناس کرانے کی ضرورت ہے۔وزیراعظم نے اپنے پیغام میں کہا کہ عالمی برادری کے ساتھ ہم بھی آج اساتذہ کا عالمی دن منا رہے ہیں اور اس موقع پر ہماری قوم کا مستقبل سنوارنے میں ہم اساتذہ کے کردار اور ان کی کاوشوں کا اعتراف کرتے ہیں۔وزیراعظم نے کہا کہ حکومت اساتذہ سے کئے گئے وعدو ں کی پاسداری کے لئے پرعزم ہے۔انہوں نے کہا کہ ہمارا مقصد ایسا معیاری تعلیمی نظام قائم کرنا ہے جس میں اساتذہ اور طلباء دونوں کو بااختیار بنایا جائے تاکہ وہ تیزی سے بدلتی ہوئی دنیا کے تقاضوں کے مطابق خود کو ڈھال سکیں۔