بلوچستان کا ہر بچہ میجر حسیب شہیدو دیگر بہادر بیٹوں کے خون کا مقروض ہے: سرفراز بگٹی

راولپنڈی(پی پی آئی) وزیراعلیٰ بلوچستان میر سرفراز بگٹی نے کہا ہے کہ بلوچستان کا ہر بچہ میجر حسیب شہید اور مادر وطن کی خاطر اپنا خون بہانے والے مٹی کے دیگر بہادر بیٹوں کے خون کا مقروض ہے۔ ان خیالات کا اظہار انہوں نے اتوار کے روز میجر حسیب شہید کے والد میجر (ر) اسلم چوہدری سے تعزیت کے لیے میجر حسیب شہید کی رہائش گاہ پر پہنچنے کے بعد کیا۔ انہوں نے کہا کہ میجر حسیب شہید ملک کا فخر تھے، میجر حسیب جو کہ ایک بہادر باپ کے بیٹے ہیں ہمیشہ ہمارے دلوں میں زندہ رہیں گے۔ انہوں نے دعا کی کہ اللہ تعالیٰ مرحوم کی روح کو جوار رحمت میں جگہ دے اور سوگوار لواحقین کو یہ صدمہ ہمت سے برداشت کرنے کی ہمت عطا فرمائے۔ اس موقع پر سابق نگراں وزیراعظم انوار الحق کاکڑ بھی موجود تھے۔