رواں سال کی آخری انسداد پولیو مہم کا ملک بھر میں آغاز

 اسلام آباد(پی پی آئی)رواں سال کی آخری انسداد پولیو مہم کا پیر کی صبح باضابطہ آغاز ہوگیا۔وزیراعظم شہباز شریف نے  والدین پر زور دیا ہے کہ وہ اپنے بچوں کوپولیو سے محفوظ رکھنے کے لئے اس سے بچاؤ کے قطرے لازمی پلوائیں۔انھوں نے ایک پیغام میں صوبائی حکومتوں اور بین الاقوامی شراکت داروں کے تعاون سے پاکستان سے پولیو وائرس کے خاتمے کا عزم ظاہر کیا۔ انسداد پولیو کے بارے میں وزیراعظم کی فوکل پرسن عائشہ رضا فاروق نے کہا کہ ملک کے ایک سواڑتالیس اضلاع میں تقریباً چار لاکھ پولیو کارکن پانچ سال سے کم عمر بچوں کو پولیو سے بچاؤ کے قطرے پلائیں گے۔صحت کے بارے میں رابطہ کار ڈاکٹر مختار بھرتھ نے کہا کہ رواں سال انسداد پولیو کی اس آخری مہم کے دوران پاکستان بھر میں تقریباً چار کرو ڑ چالیس لاکھ بچوں کو پولیو سے بچاؤ کے قطر ے پلائے جائیں گے۔