وزیرداخلہ محسن نقوی کاسعودی ہم منصب سے سکیورٹی تعاون پرتبادلہ خیال

ریاض(پی پی آئی)وزیر داخلہ محسن نقوی نے آج(منگل) ریاض میں اپنے سعودی ہم منصب شہزادہ عبدالعزیز بن سعود نائف سے ملاقات کی۔اس دوران باہمی دلچسپی کے دیگر امور کے ساتھ منشیات سمگلنگ سے نمٹنے کے اقدامات اور سکیورٹی تعاون کے بارے میں گفتگو کی۔دونوں فریقوں نے منشیات کے خلاف جنگ میں تعاون بڑھانے کے طریقہ کار کے بارے میں بھی بات چیت کی۔اس موقع پر محسن نقوی نے کہا کہ ہر پاکستانی کا سعودی عرب کے ساتھ مذہبی عقیدت اور احترام کا رشتہ ہے۔انہوں نے کہا کہ سعودی عرب نے ہر مشکل وقت میں پاکستان کی حمایت کی ہے۔محسن نقوی نے سعودی قیادت اور سعود ی عوام کے لئے نیک خواہشات کا اظہار کرتے ہوئے پاکستان کے لئے سعودی عرب کی حمایت پر مسرت کا اظہار کیا۔