سندھ کے شاہ بندر بلاک میں تیل و گیس کے نئے ذخائر دریافت

کراچی27دسمبر(پی پی آئی)پاکستان پیڑولیم لمیٹڈ نے سندھ  میں تیل و گیس کے نئے ذخائر دریافت کرلئے۔ پاکستان پیڑولیم لمیٹڈ کی انتظامیہ کے مطابق شاہ بندر بلاک میں جھم ایسٹ ایکس ون سے یومیہ 10 ایم ایم ایس سی ایف ڈی گیس ذخائر مل رہے ہیں، جھم ایسٹ ایکس ون کنویں سے یومیہ 150بیرل سے زائد ہلکے تیل کے ذخائر بھی حاصل کئے جارہے ہیں۔ بتایا گیا ہے کہ مذکورہ کنویں سے حاصل ہونے والے قدرتی ذخائر کا پریشر 2800 پاونڈ فی مربع انچ ہے، شاہ بندر فیلڈ سے گیس سجاول پراسیسنگ پلانٹ کے ذریعے سوئی سدرن سسٹم میں شامل ہورہی ہے۔ شاہ بندر فیلڈ میں پی پی ایل کا حصہ 63فیصد اور ماری پیڑولیم کا حصہ 32 فیصد ہے، شاہ بندر میں سندھ انرجی ہولڈنگ کا 2.5 فیصد اور گورنمنٹ ہولڈنگ پرائیویٹ لمیٹڈ کا بھی 2.5فیصد شیئر ہے۔