دعا ہے کہ نیا سال پاکستان اور دنیا کیلئے باعث رحمت ہو: گورنر سندھ

کراچی31دسمبر(پی پی آئی) گورنر سندھ کامران ٹیسوری نے نئے سال کی آمد پر پاکستانی قوم اور اقوام عالم کو مبارک باد دیتے ہوئے کہا کہ ہمیں پاکستان کو ترقی کی راہ پر گامزن کرنے کیلئے اپنی صلاحیتیں بروئے کار لانے کی ضرورت ہے، دعا ہے کہ نیا سال پاکستان اور دنیا کیلئے باعث رحمت ہو۔انہوں نے مزید کہاکہ 2024میں قوم نے ثابت قدمی، ایثار، حب الوطنی اور یکجہتی کے ساتھ ہر چیلنج کا مقابلہ کیا۔آگے کے راستہ میں بھی مشکلات ایک عمومی بات ہوگی۔ اس وقت بھی کچھ لوگوں کو روزگار اور زندگی کی مشکلات کا سامنا ہے۔ ہم سب کو ان مشکلات کا سامنا کرتے ہوئے ایک دوسرے کی مدد کرکے ان مشکلات پر قابو پانا ہوگا۔ سال 2024میں محنت کرنے والے کسان، مزدور، اور کارباری افراد ہوں یا ملک کا دفاع کرنے والے سپاہی، مختلف حلقوں سے تعلق رکھنے والے افراد نے اپنی اپنی جگہ پر غیرمعمولی خدمات سرانجام دی ہیں۔انہیں خراج تحسین پیش کرتاہوں۔انہوں نے کہا کہ 2024میں ہم انتھک جدوجہد کرتے ہوئے آگے بڑھتے رہے اور تمام آزمائشوں پر پورے اترے اور زبردست کامیابیاں حاصل کیں۔ ہم اس مشکل کے سال کو یاد رکھتے ہوئے مستقبل کے لئے پرامید ہیں۔انہوں نے کہا کہ اس وقت انسانی سماج کے لئے ایک بڑا بحران غزہ پٹی میں غاصب صیہونی حکومت کے ہاتھوں غزہ کے بے گناہ عوام کا قتل عام ہے۔ امید ہے کہ 2025 میں عالمی رہنماو ں کی مشترکہ کاوشوں سے غزہ میں قتل عام کے خلاف اور عالمی امن کے لئے ان کے اقدامات کامیابی سے ہمکنار ہوں گے۔ انہوں نے کہا کہ میری دعا ہے کہ سال 2025 پاکستان اور امت مسلمہ کے لئے امن و استحکام، ترقی و خوشحالی کا سال ثابت ہو، پوری دنیا میں جہاں جہاں بھی مسلمان مصیبتوں کا شکار ہیں ا ن کے لئے اللہ رب العزت بے شمار آسانیاں پیدا کریں، دعا ہے کہ مقبوضہ جموں و کشمیر اور فلسطین کے لوگوں پر چھائے ظلم و جبر کے اندھیرے چھٹ جائیں۔