بادلوں کا مغربی سسٹم پاکستان میں داخل، 20 جنوری تک سرد موسم کی پیشگوئی

اسلام آباد18جنوری (پی پی آئی)محکمہ موسمیات نے پیشگوئی کی ہے کہ مغرب سے آنے والا بادلوں کا سسٹم پاکستان میں داخل ہوگا جو 20 جنوری تک پاکستان میں رہے گا اور اس دوران سرد موسم کی شدت مزید بڑھ جائے گی۔تفصیلات کے مطابق پنجاب کے بیشتر اضلاع میں  سورج اور بادلوں کے درمیان آنکھ مچولی کا سلسلہ رہے گا جب کہ بادلوں کا سسٹم  داخل ہونے سے راولپنڈی ڈویژن کے اضلاع میں ہلکی بارش کے امکانات ہیں۔ اسی طرح لاہور میں بادل رہیں گے لیکن بارش کے امکانات کم ہیں۔محکمہ موسمیات کے مطابق خیبرپختونخوا کے بالائی اضلاع میں گرج چمک کے ساتھ بارش اور پہاڑوں پر شدید برفباری کا امکان ظاہر کیا گیا ہے اور یہ سلسلہ 21 جنوری تک جاری رہنے کی پیشگوئی کی گئی ہے۔پی ڈی ایم اے کے مطابق، چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، ہری پور، مالاکنڈ، بونیر، باجوڑ، مہمند، خیبر، اورکزئی، کرم، وزیرستان، پشاور، چارسدہ، نوشہرہ، صوابی، بنوں، کرک اور کوہاٹ سمیت مختلف اضلاع میں وقفے وقفے سے بارش اور برفباری متوقع ہے۔