غالب ڈومکی پرفائرنگ کے تبادلے میں ہلاک ڈاکو نادر میرانی کی لاش برآمد

شکارپور، 20 جنوری (پی پی آئی) شکارپور پولیس نے پیر کو بدنام  ڈاکو نادر میرانی کی لاش برآمد کر لی،  جو خان پور کے قریب فیضو لاڑو میں اس وقت مارا گیا تھاجب اتوار کی رات مسلح افراد کے ایک گروپ نے سندھ کے سابق ایم پی اے سردار میر غالب خان ڈومکی کی ویگو گاڑی پر گھات لگا کر حملہ کیا۔ حملے کے نتیجے میں دو گارڈز جاں بحق اور  غالب ڈومکی، ان کی اہلیہ، پوتا اور ایک اور گارڈ زخمی ہوئے۔فائرنگ کے تبادلے کے دوران ڈاکو نادر میرانی ہلاک اور اس کے ساتھی زخمی ہو ئے لیکن حملہ آور اندھیرے کا فائدہ اٹھاتے ہوئے مقتول ڈاکو کی لاش اور زخمی ساتھیوں سمیت فرار ہو گئے تھے۔حملے کے بعد شکارپور پولیس نے علاقے کو گھیرے میں لے کر سرچ آپریشن شروع کر دیا۔ ان کی کوششوں نے انہیں سلطان کمالانی جتوئی گاؤں میں ایک تازہ کھودی ہوئی قبر تک پہنچایا۔ قبر کشائی کے بعد پولیس نے ڈاکو نادر میرانی کی لاش برآمد کرکے ضروری کارروائی کے لیے تعلقہ اسپتال خانپور منتقل کردی۔اس افسوسناک واقعے نے ضلع شکارپور میں امن و امان کی بگڑتی ہوئی صورتحال کو واضح کر دیا ہے۔ اطلاعات کے مطابق سردار میر غالب خان ڈومکی اپنے اہل خانہ کے ہمراہ سکھر سے بخشا پور جارہے تھے کہ شکارپور کندھ کوٹ انڈس ہائی وے پر مرزا واہ آبپاشی کینال کے قریب حملہ ہوا۔