پاکستان بحریہ کے نئے جہازیمامہ کا جدہ کی بندرگاہ کا دورہ

اسلام آباد29جنوری (پی پی آئی)پاکستان بحریہ میں شامل کئے گئے نئے جہاز یمامہ نے رومانیہ سے پاکستان اپنے پہلے سفر کے دوران سعودی عرب کے شہر جدہ کی بندرگاہ کا دورہ کیا اور شاہی سعودی بحریہ کے ساتھ ایک گزرگاہ مشق میں حصہ لیا۔ شاہی سعودی بحریہ فورسز کے اعلیٰ حکام اور پاکستانی سفارت خانے کے نمائندوں نے جدہ بندرگاہ پہنچنے پر جہاز کا گرمجوشی سے استقبال کیا۔جہاز کے عملے نے اپنے قیام کے دوران شاہی سعودی بحریہ فورسز کی قیادت کے ساتھ ملاقاتیں کیں اور پیشہ ورانہ سرگرمیوں میں حصہ لیا جن میں جہازوں کے دورے اور بحری امور پر تبادلہ خیال شامل ہے۔بندرگاہ کے دورے کے بعد پی این ایس  یمامہ نے ایچ ایم ایس مکہ کے ساتھ گزرگاہ مشق بھی کی۔ یہ مشق دونوں ملکوں کی بحریہ کے درمیان بحری تعاون کو مستحکم بنانے اور کارروائیوں کے فروغ کے لیے ترتیب دی گئی تھی۔ دونوں افواج نے سمندری سلامتی کو یقینی بنانے اور علاقائی استحکام کو فروغ دینے کے اپنے عزم کا اعادہ کیا۔