کے الیکٹرک کی جانب سے 13 پی ایم ٹیز بند کرنے کے خلاف ٹھٹھہ میں شہریوں کا دھرنا

 ٹھٹھہ یکم فروری (پی پی آئی)کے الیکٹرک کی جانب سے 13 پی ایم ٹیز بند کرنے کے خلاف شہریوں نے ٹھٹھہ کراچی قومی شاہراہ پر دھرنا دیا۔ دھرنے کے باعث قومی شاہراہ پر گاڑیوں کی لمبی قطاریں لگ گئیں اور ٹریفک کی روانی شدید متاثر ہوئی۔شہریوں کا کہنا  تھا کہ کے الیکٹرک  بغیر کسی جواز کے 13 پی ایم ٹیز کو بند کر رہی ہے جس کی وجہ سے لوڈشیڈنگ کا دورانیہ 10 گھنٹے تک پہنچ چکا ہے۔ شہریوں نے اس صورتحال کو ناقابل برداشت قرار دیتے ہوئے شدید احتجاج کیا۔نئی آبادی نیازی کالونی اور گھارو نمبر دو کے رہائشیوں نے کہا کہ ان کی بجلی ایک ماہ سے مسلسل لوڈشیڈنگ کی وجہ سے بند ہے جس کی وجہ سے ان کی زندگی اجیرن ہو چکی ہے۔ شہریوں نے مطالبہ کیا کہ فوری طور پر لوڈشیڈنگ کا خاتمہ کیا جائے اور بجلی کی فراہمی بحال کی جائے۔