معلومات کی فراہمی اور ماحولیاتی شعور بیدار کرنے کا طاقتور ذریعہ ریڈیو ہے: وزیراعلیٰ سندھ

کراچی13فروری (پی پی آئی) وزیراعلیٰ سندھ سید مراد علی شاہ نے ریڈیو کے عالمی دن پر اپنے پیغام میں کہا کہ ریڈیو عوام تک درست معلومات پہنچانے کا مؤثر ذریعہ ہے۔وزیراعلیٰ سندھ نے کہا کہ پاکستان پیپلز پارٹی صحافت کی آزادی اور عوام تک درست معلومات فراہم کرنے پر یقین رکھتی ہے۔ اس سال ریڈیو کا عالمی دن ’ریڈیو اور موسمیاتی تبدیلی‘ کے عنوان سے منایا جا رہا ہے۔ وزیر اعلیٰ ہاؤس سندھ کے بیان کے مطابق مراد علی شاہ نے کہا کہ دنیا بھر میں موسمیاتی تبدیلی ایک سنگین چیلنج بن گئی ہے۔ انہوں نے کہا کہ ریڈیو کے ذریعے موسمیاتی تبدیلی کے اہم مسئلے پر مؤثر عوامی آگاہی کو فروغ دینا چاہئے۔ وزیراعلیٰ سندھ نے مزید کہا کہ ریڈیو معلومات کی فراہمی اور ماحولیاتی شعور بیدار کرنے کا طاقتور ذریعہ ہے۔ انہوں نے ماحولیاتی تحفظ کے لیے میڈیا اور ریڈیو کے کردار کو انتہائی اہم قرار دیا۔ سید مراد علی شاہ نے کہا کہ ریڈیو کے ذریعے موسمیاتی تبدیلی کے اثرات، وجوہات اور حل عوام تک باآسانی پہنچ سکتے ہیں۔وزیراعلیٰ سندھ نے مزید کہا کہ ریڈیو اسٹیشنز ماحولیاتی مسائل اجاگر کریں تو سندھ حکومت ہر ممکن تعاون کرے گی۔