کراچی میں ترقیاتی کام جاری، رمضان میں ٹریفک سسٹم کی بہتری اور پانی کی فراہمی اولین ترجیح: میئر کراچی

کراچی،3مارچ (پی پی آئی)میئر کراچی بیرسٹر مرتضیٰ وہاب نے کہا ہے کہ شہر کے تمام اضلاع میں ترقیاتی کام جاری ہیں، جو بلاامتیاز مکمل کیے جا رہے ہیں۔ انہوں نے کہا کہ رمضان المبارک کے دوران پانی کی مسلسل فراہمی، نکاسی آب اور ٹریفک مینجمنٹ ان کی اولین ترجیحات میں شامل ہیں۔یہ بیان میئر کراچی کی جانب سے جاری کردہ پریس ریلیز میں دیا گیا۔ پیر کے روز انہوں نے اپنے دفتر میں مختلف یوسی چیئرمینوں سے ملاقات کی، جس میں سٹی کونسل کے پارلیمانی لیڈر کرم اللہ وقاصی، ڈپٹی پارلیمانی لیڈر دل محمد اور دیگر مقامی رہنما بھی شریک تھے۔ یوسی چیئرمینوں نے اپنے علاقوں کے مسائل سے میئر کراچی کو آگاہ کیا، جن میں سے بعض کے حل کے لیے انہوں نے موقع پر احکامات جاری کیے۔میئر کراچی نے سٹی وارڈنز کو ہدایت دی کہ وہ رمضان میں افطار کے وقت ٹریفک پولیس کے ساتھ مل کر ٹریفک کی روانی کو یقینی بنائیں۔ انہوں نے ڈائریکٹر سٹی وارڈن راجہ رستم کو ہدایت دی کہ شہر کے پانچ اضلاع میں 57 اہم مقامات، مساجد اور شاپنگ پلازوں کے اطراف تعینات وارڈنز کو فعال رکھا جائے تاکہ ٹریفک کی روانی متاثر نہ ہو۔انہوں نے ڈائریکٹر انسداد تجاوزات کو بھی ہدایت دی کہ ٹریفک میں رکاوٹ بننے والی تجاوزات فوری طور پر ختم کی جائیں اور تجاوزات کے خلاف کارروائی جاری رکھی جائے۔مرتضیٰ وہاب نے کہا کہ جو ترقیاتی منصوبے زیر تکمیل ہیں، ان پر رمضان المبارک میں بھی کام جاری رہے گا تاکہ وہ وقت پر مکمل ہو سکیں۔ انہوں نے مزید کہا کہ جن منصوبوں کے ٹینڈر جاری ہو چکے ہیں، ان کے لیے فنڈز دستیاب ہیں اور انہیں جلد مکمل کیا جائے گا۔انہوں نے کہا کہ کراچی میں جاری ترقیاتی کام عوام دیکھ رہے ہیں اور پیپلزپارٹی کے چیئرمین بلاول بھٹو زرداری کے وڑن کے مطابق شہر کو ترقی کی راہ پر گامزن کیا جائے گا۔میئر کراچی نے یوسی چیئرمینوں کو ہدایت دی کہ وہ اپنے علاقوں میں ترقیاتی کاموں کو جلد مکمل کریں اور عوامی مسائل کے حل میں کوئی کسر نہ چھوڑیں۔ انہوں نے کہا کہ بلدیہ عظمیٰ کراچی یوسی چیئرمینوں کے ساتھ کھڑی ہے اور شہر کی بہتری کے لیے ہر ممکن مدد فراہم کی جائے گی۔