کم آمدنی والے2 لاکھ گھروں کو سستے سولر ہوم سسٹم کٹس فراہم کیے جائیں گے:وزیراعلیٰ سندھ

کراچی،5مارچ (پی پی آئی)سندھ حکومت نے قابلِ تجدید توانائی کی جانب ایک اور قدم اٹھاتے ہوئے کراچی میں ایک اہم تقریب کا انعقاد کیا، جس میں وزیراعلیٰ سید مراد علی شاہ نے مستحق خاندانوں میں سولر ہوم سسٹمز کی تقسیم کا آغاز کیا۔”وزیراعلیٰ سندھ نے بتایا کہ سندھ سولر انرجی پروجیکٹ محکمہ توانائی سندھ کے تحت جاری ہے اور ورلڈ بینک کے تعاون سے سندھ میں سولر توانائی کے فروغ کا اہم اقدام ہے۔ انہوں نے کہا کہ کمپوننٹ تھری کے تحت کم آمدنی والے دو لاکھ گھروں کو سستے سولر ہوم سسٹم کٹس فراہم کیے جائیں گے۔”وزیراعلیٰ نے مزید کہا کہ ہر تصدیق شدہ سولر ہوم سسٹم کٹ میں 80 واٹ سولر پینل، کنٹرول یونٹ، لیتھیم آئرن بیٹری، تین ایل ای ڈی بلب، موبائل چارجنگ، اور ڈی سی پنکھا شامل ہوگا۔ سندھ کے تمام اضلاع میں 6666 سولر ہوم سسٹم کٹس فی ضلع تقسیم کی جائیں گی۔”مستحق خاندانوں کی شناخت بینظیر انکم سپورٹ پروگرام کے NSER ڈیٹا کے ذریعے کی گئی ہے۔ پی ایم ٹی اسکور 21 سے 50 کے درمیان رکھنے والے مستحقین کو سبسڈی کے تحت صرف 6000 روپے میں کٹ فراہم کی جائے گی۔”سندھ حکومت جولائی 2025 کے اختتام تک دو لاکھ سولر ہوم سسٹم کٹس کی تقسیم مکمل کرے گی۔ ہر ضلع میں ہفتہ وار 400 سولر ہوم سسٹم کٹس تقسیم کرنے کا ہدف مقرر کیا گیا ہے۔”وزیراعلیٰ نے کہا کہ منتخب این جی اوز جیسے ہینڈز، سرسو، سافکو وغیرہ کٹس کی تقسیم میں معاونت کریں گی۔ اس منصوبے کے تحت سندھ کے کم آمدنی والے افراد کو بجلی کی سہولت فراہم کرنے میں مدد ملے گی۔”وزیراعلیٰ نے مزید کہا کہ سندھ حکومت کی توانائی پالیسی جدید، مستحکم اور ماحول دوست ہے۔ انہوں نے کہا کہ گرین انرجی وقت کی ضرورت ہے اور ہم توانائی کے شعبے میں ترقی یافتہ ممالک کی صف میں شامل ہونے کے لیے کوشاں ہیں۔”وزیراعلیٰ نے بلاول بھٹو زرداری کی عالمی برادری کو پاکستان کے موسمیاتی نقصانات سے آگاہ کرنے کی کاوشوں کی بھی تعریف کی۔ انہوں نے کہا کہ تھر کول منصوبے سے 3300 میگاواٹ سستی بجلی نیشنل گرڈ میں شامل ہو رہی ہے۔”وزیراعلیٰ نے کہا کہ بینظیر انکم سپورٹ پروگرام کے تحت غریب خاندانوں کو سولر ہوم سسٹم مفت فراہم کیے جا رہے ہیں اور عوام کو بجلی کے متبادل، سستے اور ماحول دوست ذرائع فراہم کیے جا رہے ہیں۔”وزیراعلیٰ نے کہا کہ سید ناصر حسین شاہ کی قیادت میں توانائی کے شعبے میں ٹھوس تبدیلیاں آ رہی ہیں اور سندھ کی انرجی ٹیم توانائی کو سستا، قابل رسائی اور متحرک بنا رہی ہے۔ انہوں نے کہا کہ سندھ حکومت پائیدار ترقی کے اہداف کے حصول میں بڑا کردار ادا کر رہی ہے۔”وزیراعلیٰ نے کہا کہ سی او پی معاہدوں کے مطابق گرین انرجی کے فروغ کے لیے پرعزم ہیں اور سندھ میں سستی اور متبادل توانائی کے منصوبے عوام کے لیے گیم چینجر ثابت ہوں گے۔”انہوں نے کہا کہ محکمہ توانائی کے سولر منصوبے عوام کو 300 یونٹ مفت بجلی کی فراہمی میں معاون ثابت ہوں گے۔ پیپلز پارٹی کے منشور کے تحت ہر گھر کو سستی اور متبادل توانائی کی فراہمی ہمارا مشن ہے۔”وزیراعلیٰ نے صدر آصف زرداری کے حالیہ دورے میں چینی کمپنیوں سے 350MW اور 75MW کے ونڈ اور سولر ہائبرڈ منصوبوں کے معاہدے کا بھی ذکر کیا۔ انہوں نے کہا کہ ترقی یافتہ ممالک روایتی ایندھن سے صاف توانائی کی طرف بڑھ رہے ہیں اور صاف توانائی کے فروغ کے لیے سندھ حکومت کے بڑے منصوبے جاری ہیں۔”وزیراعلیٰ نے کہا کہ ماحولیاتی تحفظ اور توانائی کے بحران کے حل کے لیے سندھ حکومت متحرک ہے اور سندھ حکومت نے عالمی معیار کے مطابق توانائی منصوبے شروع کیے ہیں۔ انہوں نے کہا کہ صاف توانائی ہی روشن مستقبل کی ضمانت ہے۔”وزیراعلیٰ نے کہا کہ سندھ حکومت کے اقدامات سے عام آدمی کو ریلیف ملے گا۔ انہوں نے کہا کہ پاکستان کا مستقبل گرین انرجی میں ہے۔”