صحت کا شعبہ حکومت کی فوری توجہ کا متقاضی: الطاف شکور

کراچی(پی پی آئی) پاسبان ڈیموکریٹک پارٹی کے چیئرمین الطاف شکور نے کہا ہے کہ صحت کا شعبہ فوری حکومتی توجہ کا متقاضی ہے، کیونکہ غریب مریض مہنگے نجی علاج اور سرکاری اسپتالوں میں سہولیات کی کمی کے باعث شدید مشکلات کا شکار ہیں۔انہوں نے کہا کہ غذائی قلت، آلودگی اور ناقص صفائی کے باعث بیماریاں بڑھ رہی ہیں، اور جب مریضوں کو اسپتال میں داخلے کی ضرورت پڑتی ہے تو یہ ان کے لیے ایک بڑا مسئلہ بن جاتا ہے۔ انہوں نے زور دیا کہ نجی اسپتالوں میں علاج عام آدمی کی پہنچ سے باہر ہے، اس لیے حکومت کو سرکاری اسپتالوں میں طبی سہولیات کو فوری طور پر بہتر بنانا ہوگا۔الطاف شکور نے مطالبہ کیا کہ تمام ضلعی اسپتالوں کو تدریسی اسپتالوں میں اپ گریڈ کیا جائے اور ہر ضلع میں کم از کم ایک سرکاری تدریسی اسپتال قائم کیا جائے۔ انہوں نے تجویز دی کہ نجی شعبے کو بھی تدریسی اسپتال اور میڈیکل کالجز قائم کرنے کے لیے حوصلہ افزائی دی جائے، تاکہ وہ پاکستانی طلبہ جو طبی تعلیم کے لیے وسطی ایشیائی ممالک جاتے ہیں، انہیں مقامی سطح پر معیاری تعلیم فراہم کی جا سکے۔انہوں نے ناقص صفائی کو بیماریوں کے پھیلاؤ کی بنیادی وجہ قرار دیتے ہوئے کہا کہ بلدیاتی قوانین کی خلاف ورزی کرنے والوں کے خلاف سخت کارروائی کی جائے۔ انہوں نے کہا کہ عوامی مقامات پر کچرا پھینکنے اور ماحولیاتی آلودگی پھیلانے والوں کو سخت سزائیں دی جانی چاہئیں۔انہوں نے کراچی میں سڑکوں کی تعمیراتی سرگرمیوں کے باعث بڑھتی ہوئی فضائی آلودگی پر تشویش کا اظہار کرتے ہوئے کہا کہ تعمیراتی منصوبوں کے ٹھیکیدار محفوظ انجینئرنگ اصولوں پر عمل نہیں کر رہے، اور اس حوالے سے حکومت اور پاکستان انجینئرنگ کونسل کی خاموشی افسوسناک ہے۔ انہوں نے مطالبہ کیا کہ عوامی صحت کے تحفظ کے لیے فوری اقدامات کیے جائیں۔الطاف شکور نے کہا کہ سرکاری اسپتالوں میں ایمرجنسی سروسز کو بہتر بنایا جائے، طبی اور لیبارٹری آلات کو قابلِ استعمال رکھا جائے، اور ڈاکٹروں اور طبی عملے کو جدید مشینری چلانے کی تربیت فراہم کی جائے.