دانش یونیورسٹی جدید تعلیمی معیار پر استوار کی جائے گی، احسن اقبال

اسلام آباد،15مارچ (پی پی آئی)وفاقی وزیر منصوبہ بندی و ترقی احسن اقبال نے کہا ہے کہ دانش یونیورسٹی کو جدید تعلیمی خطوط پر استوار کیا جائے گا اور اس کا دنیا کے بہترین تعلیمی اداروں کے ساتھ تعلق قائم کیا جائے گا۔ انہوں نے کہا کہ حکومت کا فرض ہے کہ غریب بچوں کو بھی اعلیٰ تعلیم کے مواقع فراہم کیے جائیں۔تقریب میں خطاب کرتے ہوئے احسن اقبال نے کہا کہ محمد شہباز شریف نے دانش سکول کا ماڈل پنجاب میں متعارف کرایا تھا اور اب دانش یونیورسٹی کے ذریعے تعلیمی شعبے میں مزید پیش رفت کی جائے گی۔انہوں نے کہا کہ نوجوان اس یونیورسٹی سے مستفید ہوں گے اور یہ ادارہ ملک کے لیے بہترین افرادی قوت فراہم کرنے میں اہم کردار ادا کرے گا۔وفاقی وزیر نے کہا کہ پاکستان کو نالج اکانومی میں تبدیل کیا جا رہا ہے، اور اس مقصد کے حصول کے لیے تعلیمی اصلاحات جاری رکھی جائیں گی۔