وزیر اعظم کو انسانی اسمگلنگکو روکنے سے متعلق ایف آئی اے اور آئی بی کی کارکردگی پر بریفنگ

اسلام آباد 17مارچ(پی پی آئی) وزیر اعظم محمد شہباز شریف نے انسانی اسمگلنگ میں ملوث ججا گینگ کے بدنام زمانہ لیڈر عثمان ججا کو پکڑنے پر وفاقی تحقیقاتی ایجنسی اور انٹیلی جنس بیورو کی تعریف کی ہے۔ ایجنسی کے حکام کے ساتھ ایک ملاقات کے دوران وزیر اعظم نے انہیں انسانی اسمگلروں کے خلاف کارروائیاں تیز کرنے کی ہدایت دی۔ انہوں نے زور دیا کہ اس طرح کی سرگرمیوں میں ملوث افراد نہ صرف زندگیوں کو خطرے میں ڈالتے ہیں بلکہ پاکستان کی عالمی ساکھ کو بھی نقصان پہنچاتے ہیں۔گینگ کے خلاف کامیاب آپریشن کو تسلیم کرتے ہوئے وزیر اعظم شریف نے اس میں شامل ہر اہلکار کو دس لاکھ روپے نقد انعام دیا۔ ججا گینگ کو گزشتہ سال یونان کی کشتی حادثے میں پاکستانیوں کی المناک ہلاکتوں سے جوڑا گیا ہے۔ملاقات میں حکام نے وزیر اعظم کو انسانی اسمگلنگ کو روکنے کے لیے ایف آئی اے اور آئی بی کی جاری کوششوں کے بارے میں بریفنگ دی۔