عراق کا کراچی میں قونصل خانہ 20 سال بعد دوبارہ فعال، ویزہ سہولیات بحال

کراچی،19مارچ (پی پی آئی)وزیراعلیٰ سندھ سید مراد علی شاہ سے عراق کے قونصل جنرل ڈاکٹر مہر مجاہد جیجان نے ملاقات کی، جس میں دو طرفہ تعلقات اور قونصل خانے کی بحالی پر گفتگو ہوئی۔ وزیراعلیٰ سندھ نے عراقی قونصل جنرل کو کراچی میں قونصل خانہ دوبارہ کھولنے پر مبارکباد دی۔ڈاکٹر مہر مجاہد جیجان نے بتایا کہ کراچی میں 20 سال کے بعد عراقی قونصل خانہ دوبارہ کھولا گیا ہے۔ انہوں نے کہا کہ ویزہ سمیت دیگر سہولیات کی بحالی کا عمل شروع کر دیا گیا ہے، جس سے سندھ کی عوام اور زائرین کو سہولت ملے گی۔وزیراعلیٰ سندھ نے کہا کہ سندھ حکومت عراقی قونصل خانے کی مکمل معاونت کرے گی۔ انہوں نے عراقی قونصل جنرل کو یقین دہانی کرائی کہ ہر ممکن تعاون فراہم کیا جائے گا۔عراقی قونصل جنرل نے کہا کہ پاکستان کے قیام کے بعد عراق نے سب سے پہلے قونصل خانہ قائم کیا تھا۔ انہوں نے بتایا کہ کراچی سے نجف کے لیے پروازیں دستیاب ہیں، جو زائرین کے لیے سہولت فراہم کریں گی۔ملاقات کے دوران وزیراعلیٰ سندھ اور عراقی قونصل جنرل نے ایک دوسرے کو رمضان کی مبارکباد بھی دی۔