پاسبانِ وطن پاکستان عید کے بعد ملک گیر رابطہ مہم کا آغاز کرے گی

مظفر آباد،24مارچ (پی پی آئی)پاسبانِ وطن پاکستان کے مرکزی صدر محمد طاہر کھوکھر نے ایک اہم بیان میں اعلان کیا ہے کہ عید کے بعد پورے ملک اور آزاد کشمیر میں پاسبانِ وطن ایک منظم اور مربوط رابطہ مہم کا آغاز کرے گی۔ اس مہم کے دوران تنظیم سازی کے عمل کو تیز کیا جائے گا اور عوامی رابطوں کو مضبوط بنایا جائے گا۔کھوکھر نے کہا کہ ان کی جماعت کو عوام کی زبردست پذیرائی حاصل ہو رہی ہے، کیونکہ لوگ برادری ازم، خاندانی موروثی سیاست، اور سرمایہ داروں کے تسلط سے بیزار ہو چکے ہیں۔ انہوں نے مزید کہا کہ ملک پر مخصوص خاندانوں کی اجارہ داری قائم ہے، جو نسل در نسل اقتدار کو منتقل کرتے آ رہے ہیں اور ان کی سیاست ذاتی مفادات کے گرد گھومتی ہے۔انہوں نے ملکی حالات پر تشویش کا اظہار کرتے ہوئے کہا کہ دہشت گردی کے ذریعے ملک کو خطرے میں ڈالا جا رہا ہے، جب کہ حکمران طبقہ اقتدار کی رسہ کشی میں مبتلا ہے۔ عوام مہنگائی، بے روزگاری، اور عدم تحفظ کا شکار ہیں، لیکن ان کی فریاد سننے والا کوئی نہیں۔طاہر کھوکھر نے کہا کہ پاسبانِ وطن ایک ایسی قیادت کو سامنے لائے گی جو عوام کے مسائل سے واقف ہو۔ ان کا کہنا تھا کہ ہمارا مقصد صرف اقتدار کا حصول نہیں، بلکہ ایک ایسا پاکستان بنانا ہے جہاں عام آدمی باعزت زندگی گزار سکے۔انہوں نے مزید کہا کہ عید کے بعد شروع ہونے والی رابطہ مہم میں ملک کے ہر شہر، قصبے، اور گاؤں میں تنظیم سازی کی جائے گی۔ یہ محض ایک سیاسی مہم نہیں، بلکہ ایک عوامی تحریک ہے جو ملک کو موجودہ استحصالی نظام سے نجات دلانے کے لیے نکالی جا رہی ہے۔ کھوکھر نے عوام کو اس نظام کے خلاف جاگنے اور مسترد کرنے کی اپیل کی۔