سندھ کے وزیرِاعلیٰ سید مراد علی شاہ سے ترکی کے قونصل جنرل مسٹر جمال سانگو کی ملاقات

کراچی،،25مارچ (پی پی آئی)سندھ کے وزیرِاعلیٰ سید مراد علی شاہ سے ترکی کے قونصل جنرل مسٹر جمال سانگو نے ملاقات کی، جس میں ترکی کی تنظیم TIKA کے پروگرام کوآرڈینیٹر حلیل ابراہیم بسران بھی شریک تھے۔ اس ملاقات میں دو طرفہ تعلقات اور باہمی دلچسپی کے امور پر بات چیت ہوئی۔وزیرِاعلیٰ سندھ نے کہا کہ سندھ اور ترکی کی تنظیم TIKA تعلیم، زراعت اور ثقافت کے شعبوں میں مل کر کام کر رہے ہیں۔ قونصل جنرل جمال سانگو نے کہا کہ ترکی کے مختلف منصوبے ان شعبوں میں جاری ہیں۔مراد علی شاہ نے بتایا کہ ٹنڈو جام ایگریکلچر یونیورسٹی میں زرعی تحقیق اور سندھ مدرستہ الاسلام یونیورسٹی میں ایک ریسرچ سینٹر قائم کیا جا رہا ہے۔ سندھ مدرستہ الاسلام یونیورسٹی میں حسن علی آفندی ریسرچ سینٹر کے لیے دو منزلہ عمارت بھی تعمیر کی جا رہی ہے۔قونصل جنرل جمال سانگو نے کہا کہ ٹھٹہ میں مکلی مقبروں پر بھی ترکی کام کر رہا ہے۔ ترکی مختلف اسپتالوں میں طبی سہولیات بشمول سماعت کے آلات فراہم کر رہا ہے۔سندھ حکومت اور ترکی نے تعلیم کے شعبے میں مزید کام کرنے پر اتفاق کیا ہے۔ TIKA کے سربراہ حلیل ابراہیم کی مدت پوری ہو گئی ہے اور انہوں نے اپنی مدت کے دوران سندھ میں کیے گئے پروجیکٹس پر بریفنگ دی۔ سید مراد علی شاہ نے حلیل ابراہیم کی خدمات کو سراہا۔