میرپورخاص ڈویژن میں میٹرک امتحانات،شدید گرمی اور بدترین لوڈشیڈنگ کے باعث طلبہ کو مشکلات

میر پور خاص،07اپریل (پی پی آئی)میرپورخاص ڈویڑن میں نویں اور دسویں جماعت کے سالانہ امتحانات کے پہلے روز ہی تعلیمی بورڈ کے دعوے کھل کر سامنے آگئے۔ شدید گرمی اور بدترین لوڈشیڈنگ کے باعث طلبہ کو شدید مشکلات کا سامنا کرنا پڑا۔تعلیمی بورڈ میرپورخاص کی جانب سے امتحانات کے بہتر انتظامات کے دعوے کیے گئے تھے، تاہم متعدد امتحانی مراکز میں پرچے لیٹ پہنچنے کی شکایات موصول ہوئیں۔ کمپری ہینسیو ہائی اسکول اور شاہ ولی اللہ ہائی اسکول میں فرنیچر کی قلت کے باعث طلبہ زمین پر بیٹھ کر پیپر حل کرتے نظر آئے۔حیسکو حکام کی جانب سے امتحانات کے دوران لوڈشیڈنگ کا سلسلہ جاری رہا، جس کی وجہ سے طلبہ کو شدید مشکلات کا سامنا کرنا پڑا۔ والدین نے مطالبہ کیا کہ امتحانات کے دوران بجلی کی لوڈشیڈنگ کا خاتمہ کیا جائے اور مراکز میں بہتر انتظامات کیے جائیں تاکہ طلبہ کو اذیت ناک صورتحال سے بچایا جا سکے۔تعلیمی بورڈ کی جانب سے رابطہ کرنے پر کوئی جواب نہیں مل سکا۔ امتحانی مراکز میں دفعہ 144 کے نفاذ کی یقین دہانی کرائی گئی ہے تاکہ امتحانات کے دوران نظم و ضبط برقرار رہ سکے۔