میرپورخاص بورڈ کے تحت نویں اور دسویں کے سالانہ امتحانات شروع

میرپور خاص،07اپریل (پی پی آئی)میرپورخاص ڈویڑن میں ثانوی و اعلیٰ ثانوی تعلیمی بورڈ کے تحت نویں اور دسویں جماعت کے سالانہ امتحانات کا آغاز ہوگیا ہے، جس میں 65 ہزار 800 طالب علم شرکت کریں گے۔ امتحانی مراکز کے اندر اور باہر دفعہ 144 نافذ کی گئی ہے تاکہ امتحانات کا پرامن انعقاد یقینی بنایا جا سکے۔ناظم امتحانات انجینئر انور علیم خانزادہ راجپوت کے اعلامیے کے مطابق، نویں جماعت کے امتحانات صبح کے اوقات میں جبکہ دسویں جماعت کے امتحانات دوپہر کے اوقات میں ہوں گے۔ میرپورخاص، تھرپارکر اور عمرکوٹ کے اضلاع سے تقریباً 65800 طلبا و طالبات امتحانات میں حصہ لیں گے۔تینوں اضلاع میں 107 امتحانی مراکز قائم کیے گئے ہیں جن میں سے بعض مراکز کو حساس قرار دیا گیا ہے۔ قانون نافذ کرنے والے اداروں کو سخت حفاظتی انتظامات کے خطوط جاری کر دیے گئے ہیں اور افسران نے دفعہ 144 کے نفاذ کی یقین دہانی کرائی ہے۔ناظم امتحانات کے مطابق نقل کی روک تھام کے لئے سخت اقدامات کیے گئے ہیں۔ میرپورخاص ضلع میں 42، عمرکوٹ میں 31 اور تھر پارکر میں 34 امتحانی مراکز قائم کیے گئے ہیں۔ ان مراکز میں بوائز، گرلز اور مشترکہ سنٹرز شامل ہیں تاکہ تمام طلبہ کے لئے مناسب انتظامات کیے جا سکیں۔