کینال منصوبے کے خلاف وکلاء۱ور محکمہ صحت کے ملازمین کا نوشہرو فیروز میں احتجاج

نوشہرو فیروز،22اپریل (پی پی آئی)نوشہرو فیروز میں وکلاء  برادری اور محکمہ صحت کے ملازمین نے کینال منصوبے کے خلاف احتجاج کیا۔ سندھ بار کونسل کی اپیل پر وکلانے عدالتی امور کا بائیکاٹ کیا اور مختلف شہروں میں مظاہرے کیے۔ احتجاج میں سندھ بار کونسل کے رکن عبد الستار لہرانی نے کہا کہ دریائے سندھ پر 6 نہریں بنا کر سندھ کے وجود کو نقصان پہنچانے کی کوشش کی جا رہی ہے جسے ناکام بنایا جائے گا۔ ان کا مطالبہ تھا کہ کینال منصوبہ اور کارپوریٹ فارمنگ اسکیم کو ختم کیا جائے۔محکمہ صحت کے ملازمین نے پریس کلب کے سامنے احتجاج کیا۔ مقررین نے کہا کہ پنجاب حکومت چھ نہریں بنا کر بنجر زمینوں کو آباد کرنے کا منصوبہ رکھتی ہے، جو اہلیان سندھ کے لیے ناقابل قبول ہے۔ احتجاجی ملازمین نے اس منصوبے کے خاتمے کے لیے نعرے بھی لگائے۔”