سندھ کے معاونِ خصوصی کی چین میں سیاسی فورم میں شرکت

کراچی،23اپریل (پی پی آئی) وزیر اعلیٰ سندھ کے معاونِ خصوصی برائے سرمایہ کاری و پبلک پرائیویٹ پارٹنر شپ، سید قاسم نوید قمر نے چین کے شہر اْرومقی میں منعقدہ ایس سی او پولیٹیکل پارٹیز فورم میں شرکت کی۔ فورم میں مختلف ممالک کے معزز مندوبین شریک تھے۔ سندھ انفارمیشن ڈپارٹمنٹ کے ہینڈآؤٹ کے مطابق، سید قاسم نے اپنے خطاب میں فورم کو ترقی اور خوشحالی کے مشترکہ اہداف طے کرنے کا بہترین موقع قرار دیا۔ انہوں نے کہا کہ یہ فورم بین الاقوامی تعاون کو مضبوط بنانے کے لئے اہم ہے۔انہوں نے پاکستان میں موجود سرمایہ کاری کے مواقعوں پر روشنی ڈالی۔ انہوں نے بتایا کہ پاکستان میں مختلف شعبوں میں سرمایہ کاری کے وسیع مواقع موجود ہیں۔سید قاسم نے سندھ حکومت کی جانب سے بین الاقوامی کمپنیوں کے ساتھ پبلک پرائیویٹ پارٹنر شپ کے منصوبوں کا ذکر کیا، جن میں تھر کول پاور پراجیکٹ کی مثال دی گئی۔انہوں نے فورم کے شرکاء کو پاکستان کے دورے کی دعوت دیتے ہوئے کہا کہ اس سے مزید شراکت داری کے مواقع تلاش کئے جا سکتے ہیں، جو باہمی ترقی اور خوشحالی کے لئے مددگار ثابت ہوں گے۔