تھائی لینڈ میں جاری چوتھے ایشیا کپ ویمنز بیس بال ٹورنامنٹ میں پاکستان کی شاندار کارکردگی

اسلام آباد،26اپریل (پی پی آئی) پاکستان کی قومی ویمنز بیس بال ٹیم نے چوتھے ایشیا کپ ویمنز بیس بال کوالیفائرز 2025 میں ایران اور سری لنکا کو شکست دے کر میڈل کے مرحلے میں جگہ بنا لی۔تھائی لینڈ میں جاری ٹورنامنٹ کے دوسرے دن پاکستان نے ایران کو 2 کے مقابلے میں 17 رنز سے ہرایا۔ ویزا مسائل کے باوجود ٹیم نے غیر معمولی عزم کا مظاہرہ کیا۔ پاکستان فیڈریشن بیس بال کے سیکریٹری جنرل سید فخر علی شاہ نے کہا کہ “یہ ہماری پہلی فتح ہے اور ہم اگلے میچ میں بھی اپنی پوری کوشش کریں گے۔”پاکستان نے سری لنکا کے خلاف دوسرے میچ میں 10-5 کی کامیابی حاصل کی۔ اس کامیابی پر پاکستان فیڈریشن بیس بال کے صدر شوکت جاوید، چیئرپرسن وومین ونگ سادیہ علوی، سیکریٹری عائشہ ارم و دیگر نے ٹیم کو مبارکباد دی۔پاکستان نے اس کامیابی کے ساتھ سیمی فائنل تک پہنچنے کا ہدف حاصل کرنے کی کوشش کی ہے۔ ٹیم لیڈر سید فخر علی شاہ، ٹیم آفیشلز و کوچز اور کھلاڑیوں کو خصوصی مبارکباد پیش کی گئی۔