گورنر سندھ کی بھارت پر تنقید: پاکستان کی قومی دفاعی طاقت پر اظہارِ اعتماد

کراچی، 28 اپریل (پی پی آ ئی) گورنر سندھ کامران خان ٹیسوری نے ترکیہ کے شہر استنبول میں منعقدہ تقریب سے خطاب کرتے ہوئے کہا کہ آرمی چیف سید حافظ عاصم منیر کے ہوتے ہوئے بھارت پاکستان پر میلی نگاہ ڈالنے کی جرات نہیں کرسکتا۔ انہوں نے کہا کہ ایس آئی ایف سی کے تحت سرمایہ کاروں کو ون ونڈو سہولیات فراہم کی جارہی ہیں۔گورنر نے بھارتی وزیراعظم نریندر مودی کو تنقید کا نشانہ بناتے ہوئے کہا کہ مودی 1965ء   بھول گیا ہے، اس نے اس قوم کو للکارا ہے جس نے کلمے کے نام پر ملک حاصل کیا ہے۔ انہوں نے مزید کہا کہ پاکستان ایک ذمہ دار ریاست ہے اور دہشت گردی کے خلاف جنگ میں اسی ہزار شہادتیں اس کا ثبوت ہیں۔کامران خان ٹیسوری نے بھارت کو عالمی دہشت گرد قرار دیتے ہوئے کہا کہ کینیڈین حکومت اور امریکی ریاست نے بھی بھارتی دہشت گردی میں ملوث ہونے کا اشارہ دیا تھا۔ انہوں نے کہا کہ بھارت میں مسلمانوں، سکھوں اور چھوٹے طبقے کی زندگی مشکل بنائی جا رہی ہے۔گورنر سندھ نے سندھ طاس معاہدے کے بارے میں کہا کہ یہ دو ملکوں کا معاہدہ ہے جس کا ضامن عالمی بنک ہے اور اسے یکطرفہ فیصلوں سے نہ تو ختم کیا جا سکتا ہے اور نہ ہی اس میں ترمیم ممکن ہے۔ انہوں نے مزید کہا کہ پاکستان امن کا خواہاں ہے مگر دشمن کو گرانے کی صلاحیت بھی رکھتا ہے۔